გაერთიანებული სამეფოს პრემიერ-მინისტრმა კირ სტარმერმა და აშშ-ის პრეზიდენტმა დონალდ ტრამპმა სატელეფონო საუბრის დროს უკრაინაში ომის სამართლიანი და ხანგრძლივი დასრულების მიღწევის მცდელობები განიხილეს, - ინფორმაციას Reuters-ი დაუნინგ სთრითზე დაყრდნობით ავრცელებს.

„ორმა ლიდერმა საუბარი უკრაინაში მიმდინარე ომის განხილვით დაიწყო“, - აცხადებენ ბრიტანეთის პრემიერის ოფისში.

მათივე ინფორმაციით, კირ სტარმერმა და დონალდ ტრამპმა ისაუბრეს ე.წ. „მსურველთა კოალიციის“ ქვეყნების მუშაობაზე, რომლებმაც უკრაინის მხარდაჭერა აღუთქვეს.

„პრემიერ-მინისტრმა მიაწოდა ინფორმაცია სამშვიდობო შეთანხმების მხარდასაჭერად და საომარი მოქმედებების სამართლიანი და ხანგრძლივი დასრულების უზრუნველსაყოფად „მსურველთა კოალიციის“ მიერ გაწეული სამუშაოს შესახებ“, - აცხადებენ ბრიტანეთის პრემიერის ოფისში.