ნატო-ს გენერალური მდივნის, მარკ რუტეს განცხადებით, დონალდ ტრამპის ამჟამინდელი კურსის მიუხედავად, ევროკავშირმა ბოლომდე უარი არ უნდა თქვას აშშ-თან თავდაცვის საკითხებში თანამშრომლობაზე.

მისივე თქმით, აშშ-ს აქვს მოლოდინი, რომ ევროპა უფრო მეტ პასუხისმგებლობას აიღებს საკუთარ თავზე და უფრო მეტს დახარჯავს თავდაცვაზე.

„საბოლოო ჯამში, საუბარია იმაზე, რომ ეს შეერთებულ შტატებთან ერთად გავაკეთოთ“, - აღნიშნა რუტემ.

რუტემ ეს განცხადება ევროპის სახალხო პარტიის (EPP) ლიდერის, მანფრედ ვებერის კომენტარებზე გამოხმაურებისას გააკეთა. ვებერის თქმით, ევროპამ უნდა შექმნას „ევროპული ნატო“, რადგან აღარ შეიძლება, რომ აშშ-ს უპირობოდ დაეყრდნონ.

ნატო-ს გენერალურმა მდივანმა აღნიშნა, რომ ძალიან აფასებს მანფრედ ვებერს, თუმცა, ამ საკითხთან დაკავშირებით მას გარკვეულწილად განსხვავებული აზრი აქვს.

„აბსოლუტურად დარწმუნებული ვარ, რომ შეერთებული შტატები სრულად უჭერს მხარს ნატო-ს. ამაში ეჭვი არ მეპარება“, - აღნიშნა რუტემ.

ამასთან, მისი თქმით, ნატო მხოლოდ შეერთებული შტატები და ევროკავშირის ქვეყნები არ არის.

„როდესაც საუბარია ევროპასა და ნატო-ზე, ეს ევროკავშირზე მეტია“, - განაცხადა რუტემ და ამ კონტექსტში დაასახელა ნატო-ს წევრი ქვეყნები, მათ შორის: გაერთიანებული სამეფო, ნორვეგია, კანადა და შეერთებული შტატები.