საქმეზე გამოთხოვილი ინფორმაციის თანახმად, ოთარ რომანოვ-ფარცხალაძე ამჟამად იმყოფება რუსეთში, საქართველოს სახელმწიფო საზღვარი 2025 წლის ივნისში დატოვა, - ამის შესახებ პროკურორმა, ლევან ვეფხვაძემ ლევან ჯანგველაძის მკვლელობის საქმეზე საუბრისას განაცხადა, რომლის ფარგლებშიც ყოფილ მთავარ პროკურორს ოთარ ფარცხალაძეს ბრალი წარედგინა.

მისივე თქმით, საქმეზე გამოძიება დაიწყო 2025 წლის მარტის თვეში, როდესაც 14 მარტს მოკლეს ლევან ჯანგველაძე.

„საქმეზე გამოთხოვილი ინფორმაციის თანახმად, ის ამჟამად იმყოფება რუსეთში, 2025 წლის ივნისში დატოვა საქართველოს სახელმწიფო საზღვარი. საქმეზე გამოძიება დაიწყო 2025 წლის მარტის თვეში, როდესაც 14 მარტს მოკლეს ლევან ჯანგველაძე. რაც შეეხება საქმეზე ოპერატიულ ინფორმაციას, სადაც უკვე გაჩნდა ფიგურანტად მოპოვებული ინფორმაციის საფუძველზე, იყო აგვისტოს თვიდან“,-აღნიშნავს ვეფხვაძე.

როგორც ლევან ვეფხვაძემ აღნიშნა, ლევან ჯანგველაძე საფრთხეს გრძნობდა უშუალოდ ოთარ რომანოვ-ფარცხალაძის და ძმებ მიქაძეებიდან, რადგან უთანხმოება ჰქონდა ბიზნესსაქმიანობასთან დაკავშირებით.

„ლოგიკურია, გელა უძილაურის საქმის მასალები აქ იქნება, იმიტომ, რომ გელა უძილაური ამ საქმეზე დადგენილია, როგორც აღმსრულებელი. ის ფაქტი, როგორ მივიდნენ გელა უძილაურამდე, ესეც დადგენილია და წარმოდგენილი მტკიცებულებებით. რაც შეეხება კონკრეტულ მტკიცებულებებს, რასაკვირველია, არის მოწმეთა ჩვენებები, გარდა ამისა, საქმეს დაემატა დამატებითი მოწმეები, რომლებიც ერთობლიობაში ასაბუთებენ იმ გარემოებას, რომ ლევან ჯანგველაძე საფრთხეს გრძნობდა უშუალოდ ოთარ რომანოვ-ფარცხალაძის და ძმებ მიქაძეებიდან. მას ჰქონდა გარკვეული მოლოდინები, რადგან დაპირისპირებული იყო, უთანხმოება ჰქონდა ბიზნესსაქმიანობასთან დაკავშირებით“, - აღნიშნავს ლევან ვეფხვაძე.

კითხვაზე, არის თუ არა საქმეში აუდიო ან ვიდეოჩანაწერი ფარცხალაძის წინააღმდეგ, ლევან ვეფხვაძე პასუხობს: „აუდიოჩანაწერიც არსებობს მოწმეთა ჩვენებების“.

ცნობისთვის, ოთარ რომანოვ-ფარცხალაძეს ბრალი ბიზნესმენ ლევან ჯანგველაძის მკვლელობის საქმეზე წარუდგინეს. კერძოდ კი, მას ბრალი საქართველოს სისხლის სამართლის კოდექსის 25/109-ე მუხლის ,,ნ“ ქვეპუნქტით წარედგინა, რაც შეკვეთით და ანგარებით განზრახ მკვლელობის ორგანიზებას გულისხმობს.

აღნიშნული დანაშაული სასჯელის სახედ და ზომად 16-დან 20-წლამდე ან უვადო თავისუფლების აღკვეთას ითვალისწინებს.

ბიზნესმენ ლევან ჯანგველაძის შეკვეთითა და ანგარებით, განზრახ მკვლელობისთვის მსჯავრდებულია გელა უძილაური. მას უვადო თავისუფლების აღკვეთა აქვს მისჯილი. აღნიშნული საქმის ფარგლებში ცალკე წარმოებად მიმდინარეობს რამდენიმე პირის საქმე, რომლის ფარგლებშიც დაკავებული არიან გიორგი მიქაძე, მამუკა ბაღდავაძე, გიორგი კაჭკაჭაშვილი და სანდრო წივწივაძე. ძებნა არის გამოცხადებული დავით მიქაძისა და გიორგი ჯოხაძის მიმართ. რაც შეეხება ოთარ რომანოვ-ფარცხალაძეს, რომელიც რუსეთის მოქალაქეა, მის მიმართ საერთაშორისო ძებნა მას შემდეგ გამოცხადდება, რაც სასამართლო აღკვეთის ღონისძიების შეფარდებაზე იმსჯელებს.