უკრაინის უსაფრთხოების სამსახურის ხელმძღვანელი, ვასილ მალიუკი თანამდებობის დატოვებას დათანხმდა, - ინფორმაციას უკრაინული მედია პრეზიდენტის ადმინისტრაციაზე დაყრდნობით ავრცელებს.

შაბათს, პრეზიდენტთან შეხვედრაზე, უსაფრთხოების სამსახურის ხელმძღვანელმა უარი განაცხადა გადადგომაზე და საგარეო დაზვერვის სამსახურში ან ეროვნული უსაფრთხოებისა და თავდაცვის საბჭოში გადასვლაზე.

მალიუკმა თავისი პოზიცია გაამართლა იმით, რომ ბოლო ეტაპზე ჰქონდა „ობობას ქსელის“-ის მასშტაბის რამდენიმე ოპერაცია და მათი ახლავე მიტოვება დანაშაული იქნებოდა.

თუმცა, მისი თქმით, თუ პრეზიდენტს ასეთი მოთხოვნა ჰქონდა, მაშინ მას საკითხი უმაღლესი რადასთვის უნდა გადაეცა და გადაწყვეტილებას პარლამენტი მიიღებდა. უკრაინული მედიის ცნობით, ბევრ დეპუტატს მალიუკის მიმართ ასეთი პროცედურის გამოყენებაზე საზოგადოების რეაქციის შიში აქვს, რადგან მას საზოგადოება ძირითადად მხოლოდ საზღვაო დრონების შემქმნელად, ყირიმის ხიდის დაბომბვისა და ოპერაცია „ობობას ქსელის“ ავტორად აღიქვამს.

უკრაინული მედია წერს, რომ ზელენსკი აღაშფოთა გენერალ მალიუკის უარმა და დაიმუქრა, რომ მალიუკს თანამდებობიდან გადააყენებდა, თუ ის ნებაყოფლობით არ გადადგებოდა. მალიუკის გუნდი მიიჩნევს, რომ მისი გათავისუფლება სხვა არაფერია, თუ არა პრეზიდენტის ადმინისტრაციის ყოფილი ხელმძღვანელის, ანდრეი ერმაკის შურისძიება მის სახლში ჩატარებულ ჩხრეკის მიმართ უსაფრთხოების სამსახურის ხელმძღვანელის პოზიციის გამო.

უკრაინული მედია წერს, რომ მალიუკმა ჩათვალა, რომ პრეზიდენტთან კონფლიქტის ესკალაცია სახელმწიფოს ზიანს მიაყენებდა და ის თანამდებობიდან გადადგომაზე დათანხმდა. გათავისუფლების დრო და წესი, რაც რადას მხრიდან კენჭისყრას მოითხოვს, უახლოეს მომავალში გადაწყდება.