Reuters - დანიისა და გრენლანდიის საგარეო საქმეთა მინისტრები ჯეი დი ვენსსა და მარკო რუბიოს შეხვდებიან
დანიისა და გრენლანდიის საგარეო საქმეთა მინისტრები ოთხშაბათს აშშ-ის ვიცე-პრეზიდენტ ჯეი დი ვენსსა და აშშ-ის სახელმწიფო მდივან მარკო რუბიოს შეხვდებიან, - ინფორმაციას Reuters-ი ავრცელებს.
დანიის საგარეო საქმეთა მინისტრის ლარს ლოკე რასმუსენის ცნობით, გრენლანდიელ კოლეგასთან ვივიან მოცფელდთან ერთად ჯეი დი ვენსსა და მარკო რუბიოს 14 იანვარს, თეთრ სახლში შეხვდება.
„შეხვედრაში მონაწილეობა აშშ-ის ვიცე-პრეზიდენტ ჯეი დი ვენსსაც სურდა და შეხვედრას, რომელიც შესაბამისად, თეთრ სახლში გაიმართება, ის უმასპინძლებს“, - განაცხადა რასმუსენმა.
მისი თქმით, დანიამ და გრენლანდიამ შეხვედრა ამერიკელი ოფიციალური პირების, მათ შორის აშშ-ის პრეზიდენტის დონალდ ტრამპის მიერ გრენლანდიასთან დაკავშირებით გაკეთებული ბოლო განცხადებების განსახილველად მოითხოვეს.
„შეხვედრა მოვითხოვეთ, რათა დისკუსია შეხვედრების ოთახში გადაგვეტანა, სადაც შევძლებთ, რომ ერთმანეთს თვალებში ჩავხედოთ და ამ საკითხებზე ვისაუბროთ“, - აღნიშნა დანიის საგარეო საქმეთა მინისტრმა.
