დანიას არაფრის გაკეთება შეუძლია, თუ რუსეთი ან ჩინეთი გრენლანდიის ოკუპაციას მოისურვებენ, - ამის შესახებ აშშ-ის პრეზიდენტმა, დონალდ ტრამპმა თეთრ სახლში ჟურნალისტებს განუცხადა.

დონალდ ტრამპმა კიდევ ერთხელ გაიმეორა, რომ აშშ-ს გრენლანდია ეროვნული უსაფრთხოებისთვის სჭირდება.

„პრობლემა ის არის, რომ დანიას არაფრის გაკეთება შეუძლია, თუ რუსეთი ან ჩინეთი გრენლანდიის ოკუპაციას მოისურვებენ, მაგრამ ჩვენ ყველაფრის გაკეთება შეგვიძლია. ეს თქვენ გასულ კვირას ვენესუელაშიც ნახეთ“, - განაცხადა ტრამპმა.

ცნობისთვის, დანიისა და გრენლანდიის საგარეო საქმეთა მინისტრები ვაშინგტონში ვიცე-პრეზიდენტ ჯეი დი ვენსსა და სახელმწიფო მდივან მარკო რუბიოს შეხვდნენ.

დანიის საგარეო საქმეთა მინისტრმა ლარს ლოკე რასმუსენმა მოლაპარაკებების შემდეგ განაცხადა, რომ გრენლანდიასთან დაკავშირებით აშშ-სთან ფუნდამენტური უთანხმოება არსებობს.