დანიასთან და გრენლანდიასთან მუშაობას ვაგრძელებთ, - ამის შესახებ ნატო-ს გენერალური მდივანი, მარკ რუტე სოციალურ ქსელში წერს.

მარკ რუტე დანიის თავდაცვის მინისტრს, ტროელს ლუნდ პოულსენს და გრენლანდიის საგარეო საქმეთა მინისტრს, ვივიან მოცფელდს შეხვდა.

„განვიხილეთ, თუ რამდენად მნიშვნელოვანია არქტიკა, მათ შორის გრენლანდია, ჩვენი კოლექტიური უსაფრთხოებისთვის და როგორ ზრდის დანია ინვესტიციებს. ამ მნიშვნელოვან საკითხებზე მუშაობას გავაგრძელებთ“, - წერს რუტე X-ზე.

ამასთან, დანიის თავდაცვის მინისტრმა, ტროელს ლუნდ პოულსენმა შეხვედრის შემდეგ განაცხადა, რომ მარკ რუტეს გრენლანდიაზე ნატო-ს სადაზვერვო მისიების დაწყება შესთავაზა.

„ნატო-ს გენერალურმა მდივანმა წინადადება მიიღო და მჯერა, რომ ახლა შეგვიძლია შევქმნათ ჩარჩო, თუ როგორ მივაღწიოთ ამას“, - აღნიშნა დანიის თავდაცვის მინისტრმა.