რუსეთის პრეზიდენტ ვლადიმერ პუტინსა და აშშ-ის პრეზიდენტის სპეციალურ წარმომადგენელ სტივენ უიტკოფს შორის მოსკოვში გამართული მოლაპარაკებები შინაარსიანი და კონსტრუქციული იყო, - ამის შესახებ კრემლის წარმომადგენელმა იური უშაკოვმა განაცხადა.

„მოლაპარაკებები დაახლოებით ოთხ საათს გაგრძელდა და იყო განსაკუთრებით არსებითი, კონსტრუქციული და, ვიტყოდი, უკიდურესად გულწრფელი და ნდობით სავსე“, - აღნიშნა უშაკოვმა.

მისი თქმით, შეხვედრა ორიენტირებული იყო უკრაინელებთან და ევროპელებთან აშშ-ის კონტაქტების შედეგების შესახებ ინფორმაციის მოპოვებაზე.

„ვიტყოდი, რომ რუსეთის პრეზიდენტის შეხვედრა ამერიკის წარმომადგენლებთან კონკრეტულად ფოკუსირებული იყო უკრაინელებთან და ევროპელ პარტნიორებთან ამერიკელების კონტაქტების შედეგების ინფორმაციის მიღებაზე და შემდგომი ქმედებების პარამეტრების ერთობლივად განსაზღვრაზე“, - განუცხადა უშაკოვმა ჟურნალისტებს.

მისი თქმით, მხარეები შეთანხმდნენ, რომ გააგრძელებენ მჭიდრო კონტაქტების შენარჩუნებას როგორც უკრაინასთან, ასევე სხვა საკითხებთან დაკავშირებით.

„განსაკუთრებით მინდა აღვნიშნო, რომ რუსეთ-ამერიკის ორმხრივი ურთიერთობების შემდგომი განვითარების საკითხები კონცეპტუალური კუთხით განიხილეს, იმის გათვალისწინებით, რომ ჩვენს ქვეყნებს თანამშრომლობის უზარმაზარი პოტენციალი აქვთ მრავალფეროვან სფეროებში“, - აღნიშნა უშაკოვმა.

ცნობისთვის, ვლადიმერ პუტინსა და სტივ უიტოფს შორის შეხვედრაზე რუსეთის მხრიდან ასევე მონაწილეობდნენ პრეზიდენტის თანაშემწე იური უშაკოვი და პრეზიდენტის სპეციალური წარმომადგენელი უცხო ქვეყნებთან ინვესტიციებისა და ეკონომიკური თანამშრომლობის საკითხებში კირილ დმიტრიევი. აშშ-ის მხრიდან პრეზიდენტ დონალდ ტრამპის სიძე ჯარედ კუშნერი და თეთრი სახლის წარმომადგენელი ჯოშ გრუენბაუმი.