რუსეთის პრეზიდენტის თანაშემწის იური უშაკოვის განცხადებით, რუსეთის პრეზიდენტ ვლადიმერ პუტინსა და აშშ-ის წარმომადგენლებს შორის გამართული მოლაპარაკებების დროს დადასტურდა, რომ ტერიტორიული საკითხის გადაწყვეტის გარეშე უკრაინაში გრძელვადიანი მოგვარების მოლოდინი შეუძლებელია.

„მთავარი ის არის, რომ ჩვენს პრეზიდენტსა და ამერიკელებს შორის ამ მოლაპარაკებების დროს კიდევ ერთხელ დადასტურდა, რომ ტერიტორიული საკითხის ანკორიჯში შეთანხმებული ფორმულის მიხედვით გადაწყვეტის გარეშე, გრძელვადიანი მოგვარების მიღწევაზე იმედის დამყარება არ ღირს“, - აღნიშნა უშაკოვმა.

მისი თქმით, რუსეთი გააგრძელებს ე.წ. სპეციალური სამხედრო ოპერაციის მიზნების თანმიმდევრულად მიღწევს მანამ, სანამ კონფლიქტი პოლიტიკური და დიპლომატიური გზებით არ მოგვარდება.

„ჩვენ, როგორც ვლადიმერ პუტინმა ხაზი გაუსვა, გულწრფელად ვართ დაინტერესებული უკრაინის კრიზისის პოლიტიკური და დიპლომატიური გზებით მოგვარებით. მაგრამ სანამ ეს არ მოხდება, რუსეთი გააგრძელებს სპეციალური სამხედრო ოპერაციისთვის დასახული მიზნების თანმიმდევრულად მიღწევას“, - განუცხადა უშაკოვმა ჟურნალისტებს.