სამხრეთ ფილიპინებში, კუნძულ ბალუკ-ბალუკთან ახლოს ბორანი, რომელზეც 350-ზე მეტი ადამიანი იმყოფებოდა, ჩაიძირა. ოფიციალური პირების თქმით, მაშველებმა სულ მცირე 316 მგზავრი გადაარჩინეს და 15 ცხედარი ამოიყვანეს, - ინფორმაციას The Associated Press-ი ავრცელებს.

სანაპირო დაცვის წარმომადგენლების თქმით, კუნძულებს შორის მოძრავი სატვირთო და სამგზავრო ბორანი M/V Trisha Kerstin 3-ი, რომელზეც 332 მგზავრი და ეკიპაჟის 27 წევრი იმყოფებოდა, ზამბოანგას პორტიდან სულუს პროვინციაში, ჯოლოს კუნძულისკენ მიემართებოდა, როდესაც, როგორც ჩანს, ტექნიკური პრობლემები შეექმნა და ჩაიძირა.

სანაპირო დაცვის მეთაურის, რომელ დუას განცხადებით, სამძებრო-სამაშველო ოპერაციებში ჩართულია სანაპირო დაცვისა და საზღვაო ძალების გემები, სათვალთვალო თვითმფრინავი, საჰაერო ძალების Black Hawk-ის ვერტმფრენი და სათევზაო ნავების ფლოტი.

მისივე ინფორმაციით, ბორნის ჩაძირვის ზუსტი მიზეზის დასადგენად გამოძიება დაიწყება.