გამოსავალია ის, რომ ყველამ ერთიანად, შეთანხმებულად მიიღოს გარკვეული გადაწყვეტილებები და მოხდეს ფასების რეგულირება, - ამის შესახებ კომპანია „წერტის“ დამფუძნებელმა ბიძინა გონაშვილმა განაცხადა.

ბიძინა გონაშვილის თქმით, მათ შემთხვევაში ფასს არა ქსელური მარკეტების „ქეშბექი“, არამედ დისტრიბუცია და ქვეყანაში პროდუქციის წარმოების მცირე მასშტაბი აძვირებს.

„გამოსავალია ის, რომ ყველამ ერთიანად, შეთანხმებულად მიიღოს გარკვეული გადაწყვეტილებები და მოხდეს ფასების რეგულირება.

ჩვენ ხორცის მწარმოებელი კომპანია ვართ და ამ მიმართულებით ქვეყანაში ადგილობრივი წარმოება უნდა გაიზარდოს. ჩვენს შემთხვევაში „ქეშბექი“ პრობლემა არ არის. ჩვენს შემთხვევაში ფასს დისტრიბუცია აძვირებს, ასევე მასშტაბიც არ არის ქვეყანაში, რაც ასევე პრობლემას ქმნის“, - განაცხადა ბიძინა გონაშვილმა.

ცნობისთვის, პრემიერ-მინისტრი სასურსათო პროდუქციის ფასებთან დაკავშირებით მოქმედი სამთავრობო საკოორდინაციო კომისიის ფორმატში ქართველ მწარმოებლებს შეხვდა.