ბათუმში, გოგოლის ქუჩაზე მდებარე მრავალბინიან კორპუსებს მთავრობა სოციალური მიზნისთვის გამოიყენებს , - ამის შესახებ აჭარის ჯანდაცვისა და სოციალური დაცვის მინისტრმა ნინო ნიჟარაძემ, აქციის მონაწილეებთან შეხვედრისას განაცხადა.

მინისტრი ნინო ნიჟარაძე, სამინისტროს და ბათუმის მერიის წარმომადგენლებთან ერთად, გოგოლის ქუჩაზე მიმდინარე საპროტესტო აქციის მონაწილეებს შეხვდა.

მინისტრმა შეკრებილებს სიტყვით მიმართა და განუმარტა, რომ გოგოლის ქუჩაზე მდებარე მრავალბინიანი კორპუსები არის სახელმწიფოს ქონება და გამოყენებული იქნება სოციალური მიზნებისთვის.

ნინო ნიჟარაძემ მოუწოდა ოჯახებს, მიმართონ განცხადებით ქალაქ ბათუმის მერიას, სადაც ფუნქციონირებს სხვადასხვა უწყების წარმომადგენლისგან შემდგარი კომისია და თითოეული ოჯახის განცხადება კრიტერიუმების შესაბამისად ინდივიდუალურად განიხილება.

„გოგოლის ქუჩაზე მდებარე მრავალბინიანი კორპუსები არის სახელმწიფოს ქონება და მთავრობის გადაწყვეტილებით, გათვალისწინებული იქნება სოციალური მიზნებისთვის. სპეციალური კომისიის მიერ თითოეული განცხადება იქნება ინდივიდუალურად შესწავლილი და ვინც დააკმაყოფილებს კრიტერიუმებს - როგორიცაა უსახლკარო მოქალაქე, სოციალური ქულა, შშმ სტატუსი, ეკომიგრანტი და ა.შ. აუცილებლად მიიღებს ბინას. გარდა ამისა, აღნიშნული შენობა დღევანდელი მოცემულობით არ აკმაყოფილებს საცხოვრებელ პირობებს, ამიტომ დამატებითი სამუშაოები იქნება ჩასატარებელი, რასაც დასჭირდება გარკვეული დრო“, - აღნიშნა მინისტრმა, ნინო ნიჟარაძემ.

ცნობისთვის რამდენიმე დღეა, გოგილის ქუჩაზე მოქალაქეები საპროტესტო აქციას მართავენ და საცხოვრებელი ფართებით დაკმაყოფილებას ითხოვენ.