ჩვენ არ ვართ კლასში და ჯგუფელები არ არიან არც შვედეთი, არც დანია, არც გერმანია, არც საფრანგეთი და არც არავინ - შვედეთი ცდილობს ჩვენს მენტორობას, ცხვირაწეული გვესაუბრება და რაღაც მიმართებებით ჭკუას გვასწავლის - რა თქმა უნდა, შეშფოთებული ვართ არა მხოლოდ შვედეთის მიმართ არამედ, სხვების მიმართ, - ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებთან განაცხადა.

მისივე თქმით, დიდპატარაობა არ არის წესებზე დაფუძნებულ საერთაშორისო წესრიგში.

„საქართველო არის 3000-წლოვანი სახელმწიფოებრიობის მქონე ქვეყანა, რომელსაც დემოკრატიის ასწლოვანი გამოცდილება აქვს და იყო ერთ-ერთი პირველი ევროპული დემოკრატია, სადაც არჩევითობის პრინციპი დამკვიდრდა. ვერ გავიგე რატომ უნდა ვასწავლებინოთ ჭკუა სხვებს და რატომ არ უნდა მივუთითოთ სხვებს იმ ხარვეზებზე, რომლებიც მათ ქვეყნებში არის?! ამიტომ, რა თქმა უნდა, ჩვენ ყველას მივუთითებთ იმ ხარვეზებზე და მოვითხოვთ კიდეც. რა რეაგირება იქნება ამაზე ძალიან გვაინტერესებს. ან ჩვენ ავყვებით იმ მცირე უსამშობლოების ჯგუფს, რომლებიც ამბობენ, რომ ჩვენ უნდა ვიყოთ საკავშირო რესპუბლიკის დონეზე, როგორც საბჭოთა კავშირში ვიყავით, ან ჩვენ ვიქცევით როგორც დამოუკიდებელი, სუვერენული სახელმწიფო, რომელიც უპირველეს ყოვლისა, ითხოვს, პატივი სცენ მის სახელმწიფოებრიობას. ამიტომ, რა თქმა უნდა, შეშფოთებული ვართ არა მხოლოდ შვედეთის მიმართ არამედ, სხვების მიმართ. ჩვენ გვაინტერესებს ერთი რამ - ჩანდეს ის ფარისევლობა, რომელსაც აქვს მსოფლიო პოლიტიკაში ადგილი. როდესაც საკუთარ თვალში ვერ ხედავენ დირეს და ჩვენ თვალში ეძებენ ბეწვს“, -განაცხადა პაპუაშვილმა.