ფრონტზე სიტუაცია კვლავ რთული რჩება, მოწინააღმდეგე საბრძოლო შეხების ხაზის მთელ სიგრძეზე სხვადასხვა ინტენსივობით აგრძელებს შეტევით ოპერაციებს, - ამის შესახებ უკრაინის შეიარაღებული ძალების მთავარსარდალმა ალექსანდრ სირსკიმ ჟურნალისტებთან შეხვედრისას განაცხადა.

მისი თქმით, აქტიური ფრონტის ხაზი დაახლოებით 1200 კილომეტრს შეადგენს.

„ბოლო ექვსი თვის განმავლობაში მტრის ძალების რაოდენობა დაახლოებით უცვლელი დარჩა - 711 000–712 000 სამხედრო მოსამსახურე, ოპერატიული რეზერვების ჩათვლით. ამავდროულად, ოკუპანტებმა სრულად შეასრულეს და გადააჭარბეს კიდეც არმიის დაკომპლექტების გეგმებს. ეს მიუთითებს, რომ მათი დანაკარგები აღემატება მათი შევსების შესაძლებლობას. საშუალოდ, მტერი ყოველდღიურად დაახლოებით 1 000–1 100 ჯარისკაცს კარგავს“, - აღნიშნა სირსკიმ.

მისი თქმით, უკრაინის თავდაცვის ძალები ასევე აქტიურად ახორციელებენ შეტევით და კონტრშეტევით ოპერაციებს. ზოგიერთ რაიონში საბრძოლო მოქმედებების დაახლოებით მეოთხედი უკრაინული ქვედანაყოფების შეტევით მოქმედებებს მოიცავს, რომლის მიზანია მტერზე მუდმივი ზეწოლის შენარჩუნება, მისთვის დანაკარგების მიყენება და ნებისმიერი წინსვლის აღკვეთა.

სირსკიმ ხაზი გაუსვა, რომ ეს ტაქტიკა შედეგებს იძლევა - მოწინააღმდეგემ იანვარში მნიშვნელოვან ოპერატიულ წარმატებებს ვერ მიაღწია.

„ყველაზე ინტენსიური საბრძოლო ოპერაციები გრძელდება პოკროვსკის რაიონში, განსაკუთრებით ოჩერტინოს მიმართულებით და როდინსკოეს რაიონში. აქ მტერმა ყველაზე მეტი ძალისა და საშუალების კონცენტრირება მოახდინა. ყოველდღე ისინი ცდილობენ როდინსკოეს აღებას, რათა შეაღწიონ ჩვენი ჯგუფის ზურგში. ბრძოლები უკიდურესად ინტენსიურია, მაგრამ მტერი წარმატებას ვერ აღწევს. თავად პოკროვსკში ქალაქის ჩრდილოეთ ნაწილს უკრაინის თავდაცვის ძალები აკონტროლებენ“, - აღნიშნა მთავარსარდალმა.