საქართველოს ტექნიკური უნივერსიტეტის რექტორის, დავით გურგენიძის განცხადებით, შეხვედრაზე პრემიერ-მინისტრმა მოისმინა სტუ-ის აკადემიური საბჭოს არგუმენტები და გაითვალისწინა როგორც პროფესორ-მასწავლებლების, ისე სტუდენტების მიერ წამოჭრილი საკითხები.

მისი თქმით, პრემიერთან შეხვედრა კონსტრუქციული და პროდუქტიული იყო.

„საქართველოს პრემიერ-მინისტრთან, განათლებისა და მეცნიერების მინისტრთან შედგა შეხვედრა. პრემიერ-მინისტრმა მოისმინა არგუმენტები, რომელიც ჰქონდა სტუ-ს აკადემიურ საბჭოს. ჩვენ შევჯერდით საკითხებზე, პრემიერმა გაითვალისწინა ყველა საკითხი, რომელიც პროფესორ-მასწავლებლებსა და სტუდენტებს ჰქონდათ. შემდეგ გვქონდა მსჯელობა ჰუმანიტარულ პროგრამებზე. ჩვენ შეჯერებული ვიყავით, ისინი წავლენ მილევად რეჟიმში, შემდეგ კი გადავლენ თსუ-ში. მინდა ვთქვა, რომ შეხვედრა იყო კონსტრუქციული და პროდუქტიული. რასაც 10 დღის განმავლობაში ვამბობდი, ჩვენი ხელისუფლება, პრემიერ-მინისტრის ხელმძღვანელობით არის დემოკრატიული და ის არ ჰგავს ყოფილ ხელისუფლებას“,- განაცხადა რექტორმა.

რექტორმა ახალგაზრდებს მიმართა და აღნიშნა, რომ სტუ-ში ჰუმანიტარული მიმართულებები ყოველთვის არსებობდა და მათი არსებობა აუცილებელია საინჟინრო-ტექნოლოგიური უნივერსიტეტის სრულფასოვანი განვითარებისათვის.

მისივე განცხადებით, კონკურსის წესით არჩეული პროფესორ-მასწავლებლები საქმიანობას გააგრძელებენ.

დავით გურგენიძის თქმით, ამ ეტაპზე უნივერსიტეტში ფუნქციონირებს სამი ფაკულტეტი — სამართლისა და საერთაშორისო ურთიერთობების, სოციალურ მეცნიერებათა და ბიზნეს ტექნოლოგიების ფაკულტეტები, სადაც სოციალურ-ჰუმანიტარული მიმართულებებია წარმოდგენილი.

აღნიშნულ პროგრამებთან დაკავშირებით მსჯელობა გაგრძელდება და ისინი ეტაპობრივად, ე.წ. მილევად რეჟიმში იმუშავებენ, შემდეგ კი თსუ-ში გადავა.

„სტუ-ი ყოველთვის იყო დიდი ტექნოლოგიური საინჟინრო სკოლა, როგორც პრემიერმა ბრძანა, მასში იქნება რეფორმისთვის ძალიან დიდი ინვესტიცია, ჩატარდება რეფორმა და ის ჩამოყალიბდება რეგიონში ერთ-ერთ დიდ, მძლავრ ტექნიკურ-ტექნოლოგიურ უმაღლეს დაწესებულებად.

მინდა ვუთხრა ახალგაზრდებს, ჩვენ უნივერსიტეტში ყოველთვის იყო ჰუმანიტარული კათედრები და საინჟინრო-ტექნოლოგიური უნივერსიტეტს სჭირდება ჰუმანიტარული მიმართულება. ასე რომ, პროფესორები, რომლებიც კონკურსებით არიან არჩეულები, მუშაობას გააგრძელებენ. ჩვენ გვაქვს სამი ფაკულტეტი, ეს არის: სამართლისა და საერთაშორისო მიმართულების ფაკულტეტი, სოციალურ- მეცნიერების ფაკულტეტი და ბიზნეს ტექნოლოგიების ფაკულტეტი. აქ არის სოციალურ-ჰუმანიტარული მიმართულებები, ამაზე იქნება საუბარი, ისინი წავლენ მილევად რეჟიმში“, - განაცხადა რექტორმა.