რუსეთის უსაფრთხოების გარანტიები უკრაინის საკითხზე შეთანხმების მთავარი ელემენტი უნდა იყოს, - ამის შესახებ რუსეთის საგარეო საქმეთა მინისტრის მოადგილემ, ალექსანდრ გრუშკომ განაცხადა.

„ვაღიარებთ, რომ უკრაინაში მშვიდობიანი მოგვარებისას უნდა იქნას გათვალისწინებული უკრაინის უსაფრთხოების ინტერესები, თუმცა, რა თქმა უნდა, რუსეთის უსაფრთხოების ინტერესები უმნიშვნელოვანესია“, - აღნიშნა გრუშკომ.

მისი თქმით, ევროკავშირის ლიდერები რუსეთის უსაფრთხოების გარანტიებს არ ახსენებენ. ამის გარეშე კი სამშვიდობო ხელშეკრულება შეუძლებელია.

„თუ ყურადღებით დააკვირდებით ევროკავშირის ლიდერების მიერ გაკეთებულ ყველა განცხადებას, არავინ ახსენებს რუსეთის უსაფრთხოების გარანტიებს. ეს შეთანხმების მიღწევის მთავარი ელემენტია. ამის გარეშე სამშვიდობო ხელშეკრულება შეუძლებელია“, - აღნიშნა რუსეთის საგარეო საქმეთა მინისტრის მოადგილემ.

ალექსანდრ გრუშკო მიიჩნევს, რომ გარანტიები უნდა მოიცავდეს უკრაინის ნატო-ში გაწევრიანების პერსპექტივის გამორიცხვას, ქვეყნის ტერიტორიაზე უცხოური ჯარების განლაგებაზე უარის თქმას და, ზოგადად, იმის გარანტიებს, რომ უკრაინა საფრთხეს არ შექმნის.