ვხედავთ „ქოცური“ რეჟიმის მხრიდან ღირებულებებთან და საერთაშორისო დღის წესრიგთან აცდენას - საქართველო მოქცეულია ტოტალური იზოლაციის პირობებში, რაც ჩანს არა მარტო ვენსის მიერ საქართველოს უგულებელყოფაში, არამედ საერთაშორისო, მსოფლიო მასშტაბის იზოლაციაში , - ამის შესახებ „ლელო-ძლიერი საქართველოს“ საგარეო მდივანმა, გრიგოლ გეგელიამ განაცხადა.

მისივე თქმით, არსებული პოლიტიკის პირობებში, საქართველოსა და აშშ-ს შორის ურთიერთობების ნორმალიზების და გაუმჯობესების არავითარი საშუალება არ არსებობს.

„ვიცით, ამერიკის შეერთებული შტატების ღირებულებები და პოზიცია, ასევე, ვხედავთ, „ქოცური“ რეჟიმის მხრიდან ღირებულებებთან და საერთაშორისო დღის წესრიგთან აცდენას. ამჟამინდელი კურსის შენარჩუნების პირობებში, საქართველოს მმართველი დე ფაქტო რეჟიმი ვერ შეძლებს ურთიერთობების რეალიზებას. ამის გამოხატულებაა ის, რომ ამერიკის შეერთებული შტატების ვიცე-პრეზიდენტი ჩამოდის რეგიონში ვიზიტით და არ ხვდება ერთ დროს ამ რეგიონის მთავარ პოლიტიკურ ცენტრს, არ ჩამოდის საქართველოში. ის, რომ საქართველო მოქცეულია ტოტალური იზოლაციის პირობებში, ჩანს არამარტო ვენსის მიერ საქართველოს უგულებელყოფაში, არამედ საერთაშორისო, მსოფლიო მასშტაბის იზოლაციაში, არცერთი სოლიდური მხარე და მნიშვნელოვანი სახელმწიფო არ ამყარებს ურთიერთობებს“, - აღნიშნა გეგელიამ.

შეგახსენებთ, აშშ-ის ვიცე-პრეზიდენტი ჯეი დი ვენსი რეგიონში ვიზიტის ფარგლებში სომხეთსა და აზერბაიჯანში შეხვედრებს მართავს. ჯეი დი ვენსი 10-11 თებერვალს აზერბაიჯანში ჩავა. ვიცე-პრეზიდენტთან ერთად აზერბაიჯანს ეწვევა აშშ-ის სახელმწიფო მდივნის მოადგილე ეკონომიკურ საკითხებში ჯეიკობ ჰელბერგი. ვიზიტის ფარგლებში ჯეი დი ვენსი სომხეთში გუშინ ჩავიდა და ქვეყნის პრემიერ-მინისტრს ნიკოლ ფაშინიანს შეხვდა. გუშინ აშშ-მა და სომხეთმა ბირთვული ენერგიის მშვიდობიანი მიზნებისთვის გამოყენების შესახებ შეთანხმება გააფორმეს, რომელსაც ჯეი დი ვენსმა და ნიკოლ ფაშინიანმა მოაწერეს ხელი.