დღევანდელი გათვლებით, ჩვენი პროდუქციის ფასს 185% ემატება და ეს 85% საიდან მოიტანეთ ვერ გავიგე – ჩვენთან ფასი როგორ წარმოიქმნება, ამას ფასის წარმოქმნა არ ჰქვია! - ეს განცხადება პარლამენტის დროებითი კომისიის სხდომაზე კომპანია „ალალის“ წარმომადგენელმა გოჩა ღვინეფაძემ გააკეთა.

ღვინეფაძემ მარკეტებში პროდუქტის დახლზე განთავსების პირობებზე ისაუბრა და განმარტა, თუ როგორ ყალიბდება მის კომპანიის მიერ წარმოებული პროდუქტის გასაყიდი ფასი მარკეტებში.

როგორც ღვინეფაძემ განაცხადა, გადასახადია “ქეშბექების“ სისტემა. მისივე თქმით, ეროვნული წარმოების პროდუქცია ქართულ მარკეტებში დახლზე უპრობლემოდ უნდა შევიდეს და ამას კანონმდებლობაში ცვლილება სჭირდება

ღვინეფაძემ ყურადღება იმაზეც გაამახვილა, რომ დღგ-ს გადახდის ერთი დღით დაგვიანების შედეგად, კომპანია ჯარიმდება, წარმოება ჩერდება, სახელმწიფო ადებს ყადაღასა და ინკასოს.

ღვინეფაძემ დღეს ისიც აღნიშნა, რომ მის ქარხანაში თავის დროზე ნამყოფი არიან გიორგი გახარია, ირაკლი ღარიბაშვილი, ასევე უსაუბრია გელა სამხარაულთან და პრობლემა ყველასთან დეტალებში აქვს გავლილი.

„ჩვენ ქართულ ბაზარზე ბრენდი “ალალის“ სახელით ვოპერირებთ. ვართ ხილისა და ბოსტნეულის გადამამუშავებელი კომპანია. პროდუქციას მთელი საქართველოს მასშტაბით ფერმერებისგან ვიბარებთ, რასაც ვამუშავებთ და მომხმარებელს წვენის სახით ვაწვდით. მონაწილეობა მიღებული გვაქვს პროექტებში “აწარმოე საქართველო“, დახმარებები მიღებული გვაქვს სოფლის მეურნეობის განვითარების სააგენტოდან და საერთაშორისო ორგანიზაციებიდან.

ჩვენი პროდუქციის 85%-90%, რასაც ქართულ ბაზარზე ვყიდით, ქსელურ მარკეტებში იყიდება, ხოლო 10% - ჰორეკა სექტოში.

ჩვენთან როგორც ფასი წარმოიქმნება, ამას ფასის წარმოქმნა არ ჰქვია. ქსელში რაღაც X ფასით შევდივართ. რასაც ჩვენ “ქეშბექს“ ვეძახით, ეს ერთი კომპონენტი არ არის. “ქეშბექი“ ციფრების მთელი ერთობლიობისგან შედგება. პირველი ეს არის ფიქსირებული გადასახადი, რომელიც ჩვენ შემთხვევაში 20.5%-ია. 20.5% არის ფიქსირებული „ქეშბექი“. ამას მარკეტინგის გადასახადი მოსდევს - 15%. შემდეგ ლოიალობის 1% მოდის. შემდეგ მოდის ციფრული მომსახურების 1%. შემდეგ არის 7.5%-იანი ლოჯისტიკის ხარჯი. ჯამში, ეს არის 45%, ფასნამატის გარდა.

ამაში არ შედის თაროზე განთავსების გადასახადი, შესვლის გადასახადი მარკეტების მიხედვით, არ შედის პალიტის გადასახადი. ტრანსპორტირებითაც ადგილამდე ჩვენ მიგვაქვს. შემდეგ მოდის ჩვენი მთავრობის საწყალი დღგ-ს გადასახადი.

ჩვენი დღევანდელი გათვლებით, პროდუქტზე ჩვენს ფასს 185% ემატება - საიდან მოიტანეთ ეს 85% ვერ გავიგე!

დადებული კონტაქტის პირობებს მარკეტები განსაზღვრავენ. რაც შეეხება დადებული კონტრაქტების პირობებს, რასაც ხელი ეწერება, კონტრაქტი არ ჰქვია, რადგან ძალაუნებურად ეთანხმები იმას, რაც მასში წერია - გინდა შედიხარ, გინდა არა!

დუმბაძის სინდრომი მეწყება: - ამ ყველაფერს რომ გადაიხდი, დღგ-საც რომ გადაიხდი, სახლში რომ მიხვალ, ცოლ-შვილი რომ გეტყვის: რა მოიტანე და ვაი მოგიკვდეთ მამაო - რა ჩემი საქმე იყო ასკილისა და ალუბლის წვენის ქარხანაო! - აი ამ დონეზე ვარ მისული. გასაღები იქ არის და დავადებ კლიტეს“, - განაცხადა გოჩა ღვინეფაძემ პარლამენტის დროებითი კომისიის სხდომაზე.

კომისიის წევრმა, პარლამენტის ვიცე-სპიკერმა ნინო წილოსანმა ღვინეფაძეს მადლობა გადაუხადა. როგორც წილოსანმა განაცხადა, მან პარლამენტის კომისიას ფასდაუდებელი ინფორმაცია მიაწოდა და დასახელებული ციფრი “ნეგატიურად შთამბეჭდავია“ იყო.

პარლამენტის დროებითი კომისია ხილის, ბოსტნეულის, წვენების და ჯემების ადგილობრივი მწარმოებელ კომპანიებს უსმენს. განხილვის თემაა პროდუქციაზე ფასწარმოქმნასთან დაკავშირებული საკითხები.