„გახარია საქართველოსთვის“ დეპუტატის სოფიო ხორგუანის განცხადებით, უმრავლესობის წარმომადგენლებს „გიორგი გახარიას კომპლექსი“ აწუხებთ და მათი გამოსვლები ამას ადასტურებს.

ასე მიმართა „გახარია საქართველოსთვის“ დეპუტატმა, სოფიო ხორგუანმა საპარლამენტო უმრავლესობას პარლამენტში.

მისივე თქმით, 20 ივნისის მოვლენების დროს გიორგი გახარიამ პარლამენტი, როგორც ინსტიტუტი, „გადაარჩინა“.

„მესმის, რომ გაწუხებთ გიორგი გახარიას კომპლექსი. იმიტომ, რომ ყველა თქვენი გამოსვლა არის ამის დადასტურება. მე ამაში ვერ დაგეხმარებით, თქვენ თავად უნდა უშველოთ თქვენს თავს. რაც შეეხება 20 ივნისს, 20 ივნისს გიორგი გახარიას ეს პარლამენტი, რომ არ გადაერჩინა როგორც ინსტიტუტი, ახლა ჩემს უკან შალვა პაპუაშვილი კი არ იქნებოდა, ვინმე სააკაშვილის მიერ იქნებოდა ხელდასხმული. ნახევარზე მეტი უკვე გადაბარგებული იქნებოდით ისევ „ნაციონალურ მოძრაობაში“.

ყოველ ჯერზე დაგიბრუნებთ, რომ ირაკლი კობახიძემ ამ სავარძელში ჩასვა გავრილოვი (სერგეი) და მერე გაიქცა. სირცხვილია თქვენი დამოკიდებულება საქართველოს მოქალაქეებისადმი. ამ ქვეყანაში უჭირს ხალხს და გადაწყვეტილებები სჭირდება, არა დემაგოგია, არა უტიფრობა, არა ჭორაობა“, - განაცხადა ხორგუანმა.