ჩვენ ვართ დამოუკიდებელი პოლიტიკური ძალა და ვაგრძელებთ დამოუკიდებლად სვლას , - ამის შესახებ „ლელო- ძლიერი საქართველოს“ წევრმა ლევან სამუშიამ „პალიტრანიუსის“ გადაცემაში „360 გრადუსი“ ოპოზიციის გაერთიანების შესაძლებლობებზე საუბარზე განაცხადა.

ლევან სამუშიას განცხადებით, ამომრჩეველს უნდა ჰქონდეს არჩევანი ოპოზიციურ ფლანგზე.

„საუბარი და კონსულტაცია რაღაც თემატურ საკითხებთან დაკავშირებით არასდროს გვიჭირდა და არ გვიჭირს. ჩვენ გვაქვს ჩვენი გამოცდილება რიგ საკითხებთან დაკავშირებით და ჩვენ გადაწყვეტილება მივიღეთ და გადაწყვეტილებაში მყარი ვართ. ჩვენ შეგვიძლია საუბარი და საუბრის პრობლემა არავისთან გვაქვს.

საკუთარი ინტერესების გადადებაზე რომ არის საუბარი, მოდით, მარტივს გეტყვით, გაგახსენებთ 2021 წლის თვითმმართველობის არჩევნებს, როდესაც თბილისის მერობის არჩევნების მეორე ტური იყო, რა გგონიათ, რომ მამუკა ხაზარაძე ნიკა მელიას მოადგილეობას ესწრაფოდა და იმიტომ გადადგა ეს ნაბიჯი და შევიდა კოალიციაში? არა, პირველ რიგში მამუკა ხაზარაძემ და მეორე რიგში „ლელომ“ აჩვენა მზაობა, რომ საკუთარი ინტერესები შეუძლია გადადოს უკან საერთო ინტერესებისთვის. ჩვენ ეს არასდროს არ გვეშლებოდა.

ჩვენ არასდროს არ ვმოქმედებდით პირადი ინტერესებიდან გამომდინარე და ახლა რასაც ვაკეთებთ და რასაც ვსაუბრობთ, ესეც არის ქვეყნის ინტერესებიდან გამომდინარე. ამომრჩეველს უნდა ჰქონდეს არჩევანი ოპოზიციურ ფლანგზე, ოპოზიციური სპექტრში, უნდა დავუტოვოთ არჩევანი“, - განაცხადა ლევან სამუშიამ.