„ოპოზიციური ალიანსი“ პირველ სამუშაო შეხვედრას მართავს. შეხვედრაზე სამომავლო გეგმებსა და სტრატეგიებზე მსჯელობენ.

როგორც შეხვედრის დაწყებამდე „კოალიცია ცვლილებებისთვის“ ერთ-ერთმა ლიდერმა, ნიკა გვარამიამ ჟურნალისტებთან აღნიშნა, ბევრი საკითხია, რომელიც განიხილება, მათ შორის საპროტესტო მოძრაობის მხარდაჭერა.

„სამუშაო ფორმატზე, გადაწყვეტილების მიღების წესზეც ვიმსჯელებთ. ჩვენ გვებრძვის რეჟიმი, რომელიც ყველა მეთოდით შეეცდება ცალკეული სუბიექტები გამოაცალოს ამ ბრძოლას, რაც არ მგონია გამოვიდეს. პირველი ნაბიჯი ყოველგვარი დათქმების გარეშე უნდა იყოს - პოლიტპატიმრები გარეთ!“ - აღნიშნა გვარამიამ ჟურნალისტებთან.

შეგახსენებთ, ოპოზიციური პარტიების ნაწილს შორის „ოპოზიციის ალიანსი“ შედგა. დოკუმენტს ხელს აწერენ - „კოალიცია ცვლილებისთვის“, „ერთიანი ნაციონალური მოძრაობა“, „სტრატეგია აღმაშენებელი“, „ფედერალისტები“, „ეროვნულ-დემოკრატიული პარტია“, „ევროპული საქართველო“ და „თავისუფლების მოედანი“ .

ხელმომწერი ოპოზიციური ძალები თანხმდებიან, საერთო სტრატეგიასა და მოქმედების ერთობლივ წესებზე და აცხადებენ, რომ ერთობლივი ძალისხმევით გაათავისუფლებენ საქართველოს ბიძინა ივანიშვილის„ავტოკრატიული რეჟიმისგან“, აღადგენენ ქვეყნის ევრო-ატლანტიკურ კურსს და უზრუნველყოფენ დემოკრატიულ მმართველობას.

შეთანხმება ემყარება რამდენიმე პრინციპს მათ შორისაა, ერთობა ერთფეროვნების გარეშე, კერძოდ, დოკუმენტის თანახმად, ალიანსის დამფუძნებელი პარტიები ინარჩუნებენ იდეოლოგიურ იდენტობას, თუმცა თანხმდებიან ერთიან საპროტესტო მოქმედებასა და საკომუნიკაციო სტრატეგიაზე.

ასევე, შეთანხმების მონაწილე პარტიები თანხმდებიან ქცევის კოდექსზე, რომელიც აწესრიგებს ხელმომწერ სუბიექტებს შორის ურთიერთობის წესებს და ადგენს პასუხისმგებლობას მათი დარღვევისთვის.„ოპოზიციის ალიანსი“ პირობას დებს, რომ „იბრძოლებს ბოლომდე - პოლიტიკური პატიმრების გათავისუფლებამდე და თავისუფალ, სამართლიან არჩევნებში გამარჯვებამდე”.