მინდა მივესალმო სულისკვეთებას, რომელიც ეუთოს საპარლამენტო ასამბლეის დელეგაციის მხრიდან მძიმე ანტიქართული, ეროვნულ პოლიტიკური კრიზისის განმუხტვის კუთხით დადებითი ნაბიჯების გადადგმის თვალსაზრისით დავინახეთ, - ეს განცხადება დღეს „ლელო - ძლიერი საქართველოს“ საერთაშორისო მდივანმა გრიგოლ გეგელიამ გააკეთა.

გეგელია აღნიშნავს, რომ დელეგაცია ძალიან კარგად არის ინფორმირებული ყველა გამოწვევასთან და დეტალთან დაკავშირებით.

„ეუთოს საპარლამენტო ასამბლეის დელეგაციასთან, რომელიც მაღალი კალიბრის დელეგაციაა, ძალიან საინტერესო და მნიშვნელოვანი შეხვედრა გვქონდა.

დელეგაცია ძალიან კარგად არის ინფორმირებული ყველა გამოწვევასთან და დეტალთან დაკავშირებით. ისინი კარგად იყვნენ ინფორმირებული პარტიებთან კონსულტაციებამდეც. ახლა კიდევ უფრო კარგად არიან ინფორმირებული ყველა კრიტიკული მიმართულების თაობაზე.

მზად ვართ, ყველა ჩვენს საერთაშორისო პარტნიორთან ვითანამშრომლოთ. ჩვენი მიზანია, რომ მივაღწიოთ პოლიტიკური სისტემის გადატვირთვას, ახალ არჩევნებს, ყველა პოლიტიკური პატიმრის გათავისუფლებას და ქართული ადეკვატური სტაბილური პოლიტიკური სისტემის მიღწევას, რაც ყველა ქართველის ინტერესების სამსახურში იქნება“, - განაცხადა გრიგოლ გეგელიამ.