დემოკრატია შეჯიბრს იმსახურებს, საკითხი პრემიერ-მინისტრთან და დანარჩენ აქტორებთან წამოვაყენეთ - აუცილებელია ყველა პარტიას შეეძლოს შეჯიბრი, - ამის შესახებ ეუთო-ს საპარლამენტო ასამბლეის პრეზიდენტმა, პერე ჟოან პონს სამპიეტრომ ჟურნალისტებთან საუბარში განაცხადა.

მისი თქმით, თუ შეეძლებათ დახმარება, „ყოველთვის აქ არიან“, მაგრამ ყველა აქტორს უთხრეს, რომ გარკვეული საკითხები „ქართველებს შორის უნდა მოგვარდეს“ .

ასევე, სამპიეტრომ განმარტა, რომ ეუთო-ს საპარლამენტო ასამბლეის დელეგაციის ვიზიტი დამთხვევაა და კავშირი არ აქვს „მოსკოვის მექანიზმის“ ფარგლებში ექსპერტების საქმიანობასთან, თუმცა შეხვედრების ფარგლებში აღნიშნულ საკითხზეც იყო საუბარი.

„ჩვენი და მათი ვიზიტი, რა თქმა უნდა, დამთხვევაა. რა თქმა უნდა, ვახსენებდით, ისინიც ახსენებდნენ, მაგრამ ჩვენთან კავშირში არაა. წვდომა არ მაქვს [“მოსკოვის მექანიზმის”] ანგარიშზე, არ მინახავს…

ვფიქრობ, რომ ყველაზე მნიშვნელოვანია ის, რომ ყველა აქტორთან ჩართულობა შევძელით. შევძელით იმის თქმა, თუ რეალურად რას ვფიქრობთ. ერთ რამეს დავამატებ - დემოკრატია, მნიშვნელობა არ აქვს რომელ ქვეყანაში, შეჯიბრს იმსახურებს. ეს საკითხი ასევე პრემიერ-მინისტრთან წამოვაყენეთ, დანარჩენ აქტორებთანაც წამოვაყენეთ, რომ აუცილებელია ქვეყანაში შეჯიბრი იყოს, რომ ყველა პარტიას შეეძლოს შეჯიბრება”, - განაცხადა სამპიეტრომ.