მინისტრი 6 წელზე მეტი წლოვანების ავტომობილებთან დაკავშირებულ გადაწყვეტილებაზე - მნიშვნელოვანი იყო, მიღწეული ყოფილიყო ჰაერის ხარისხის გაუმჯობესების მიზანი და ასევე, გათვალისწინებული ყოფილიყო კერძო სექტორის ინტერესები
მნიშვნელოვანი იყო, რომ ერთი მხრივ, მიღწეული ყოფილიყო ჰაერის ხარისხის გაუმჯობესების მიზანი და მეორე მხრივ, გათვალისწინებული ყოფილიყო კერძო სექტორის ინტერესები, - ამის შესახებ გარემოს დაცვისა და სოფლის მეურნეობის მინისტრმა დავით სონღულაშვილმა 6 წელზე მეტი წლოვანების ავტომობილებზე, შემოყვანის აკრძალვის ნაცვლად, განბაჟების 1 კუბურ მეტრზე 4.5-ლარიანი ტარიფის დაწესებასთან დაკავშირებით განაცხადა.
მისივე თქმით, გადაწყვეტილება მიღებულ იქნა მოქალაქეების საუკეთესო ინტერესებიდან გამომდინარე.
როგორც დავით სონღულაშვილმა აღნიშნა, ტარიფის ზრდა ძველი მანქანების იმპორტს შეაფერხებს, რაც, თავის მხრივ, გამოიწვევს ჰაერის ხარისხის გაუმჯობესებას.
„ჩვენი მოქალაქეების საუკეთესო ინტერესებიდან გამომდინარე, გათვალისწინებული იყო მათი თხოვნა და სწორედ, ეს იყო მოტივატორი იმისა, რომ ასეთი გადაწყვეტილება მიღებულიყო - ერთი მხრივ, შემაფერხებელი ყოფილიყო ტარიფის ზრდა ძველი მანქანების იმპორტისა და, მეორე მხრივ, ამ კუთხით შეზღუდვა გამოიწვევს ჰაერის ხარისხის გაუმჯობესებას, რაც არის გარემოს დაცვის მიმართულების ერთ-ერთი მნიშვნელოვანი პრიორიტეტი“,- აღნიშნა დავით სონღულაშვილმა.
ინფორმაციას გარემოს დაცვისა და სოფლის მეურნეობის სამინისტრო ავრცელებს.
