დონალდ ტრამპი აცხადებს, რომ ბენიამინ ნეთანიაჰუს სთხოვა, ირანის ენერგეტიკულ ობიექტებზე დარტყმები არ განეხორციელებინა და ერთმანეთს კარგად უგებენ, თუმცა ხანდახან ის „რაღაცებს აკეთებს, რაც არ მოსწონს“
აშშ-ის პრეზიდენტის, დონალდ ტრამპის განცხადებით, ისრაელის პრემიერ-მინისტრს, ბენიამინ ნეთანიაჰუს სთხოვა, რომ ირანის ბუნებრივი აირისა და ნავთობის ობიექტებზე დარტყმები არ განეხორციელებინა.
ამის შესახებ აშშ-ის პრეზიდენტმა, დონალდ ტრამპმა თეთრ სახლში მედიასთან საუბარში განაცხადა.
“ველაპარაკე მას. ვუთხარი, რომ ეს არ გაეკეთებინა. დამოუკიდებლები ვართ, კარგად ვუგებთ ერთმანეთს, ეს კოორდინირებულია, მაგრამ ხანდახან ის [ნეთანიაჰუ] რაღაცებს აკეთებს, რაც არ მომწონს”, - განაცხადა ტრამპმა.
ცნობისთვის, აქამდე ტრამპმა განაცხადა, რომ ვაშინგტონმა არ იცოდა ისრაელის გეგმის შესახებ დაერტყა ირანში “სამხრეთ ფარსის” ბუნებრივი აირის საბადოსთვის. ამავდროულად, CNN-ი წყაროებზე დაყრდნობით ინფორმაციას ავრცელებდა, რომ ტრამპმა იცოდა ამ გეგმების შესახებ.
