ევროსაბჭოს კონგრესი 1-ელ აპრილს, 50-ე სესიის ფარგლებში, საქართველოს შესახებ ანგარიშს განიხილავს.

კონგრესის სესიის დღის წესრიგში აღნიშნულია, რომ სხდომაზე განიხილება დოკუმენტი, რომელიც ფაქტების დამდგენმა მისიამ საქართველოში ვიზიტის შემდეგ მოამზადა. განიხილავენ და კენჭს უყრიან რეზოლუციის პროექტსა და რეკომენდაციის პროექტს.

ანგარიშში აღნიშნულია, რომ ევროსაბჭოს კონგრესი მოუწოდებს საქართველოს ხელისუფლებას: „სასწრაფოდ განაახლონ პოლიტიკური დიალოგი მთავრობის ყველა დონეზე, ინკლუზიური პოლიტიკური პროცესის მეშვეობით, რომელშიც ყველა დაინტერესებული მხარე იქნება ჩართული, პოლარიზაციის შესამცირებლად და პლურალისტურ დემოკრატიაში აუცილებელი კონტროლისა და ბალანსის აღსადგენად; განახორციელონ კონგრესის რეკომენდაციები და ვენეციის კომისიის მოსაზრებები, რათა აღადგინონ ნამდვილი ადგილობრივი დემოკრატია ქარტიის შესაბამისად“.

ამასთან, კონგრესი საქართველოს ხელისუფლებას მოუწოდებს, „გააუქმონ საარჩევნო კოდექსში პრობლემური ცვლილებები და განახორციელონ ყოვლისმომცველი რეფორმა, რომელსაც წინ უძღვის ფართო კონსულტაციები, ცენტრალური საარჩევნო კომისიის დამოუკიდებლობის უზრუნველსაყოფად და ყველა ძირითადი ხარვეზის აღმოსაფხვრელად; დაუყოვნებლივ შეაჩერონ ოპოზიციური ხმის კრიმინალიზაციის პროცესი და გააუქმონ ცვლილებები, რომლებიც ხელს უწყობს ოპოზიციური პარტიების აკრძალვას, დაუყოვნებლივ ხელახლა შემოიღონ გენდერული კვოტები და გააძლიერონ არსებული დებულებები ადგილობრივ პოლიტიკაში ქალების მონაწილეობის გაზრდის მიზნით; გააუქმონ ცვლილებები, რომლებიც ზღუდავს არჩევნებზე დაკვირვებას, დაუბრუნდნენ ადგილობრივი არჩევნების დასაკვირვებლად კონგრესის სისტემატურად მოწვევის პრაქტიკას და ბოლოს, ნამდვილი დიალოგის აუცილებელ წინაპირობად“.

კონგრესი ასევე მოუწოდებს ხელისუფლებას, „გააუქმოს ყველა კანონმდებლობა, რომელიც არღვევს ადამიანის უფლებებს და თავი აარიდოს ისეთი ქმედებების განხორციელებას, რომლებიც კიდევ უფრო შეაფერხებს სამოქალაქო საზოგადოებისა და მედია საშუალებების მუშაობას ან შეარყევს ადგილობრივი დემოკრატიის საფუძვლებს. კონგრესი ასევე გასცემს ძალადობის შესახებ ცნობების, განსაკუთრებით დაკავებულებისა და მომიტინგეების მიმართ ძალადობის ცნობების, საფუძვლიანად გამოძიების და დაპატიმრებული ჟურნალისტებისა და პოლიტიკური ლიდერების გათავისუფლების რეკომენდაციას“.