ნიქოზისა და ცხინვალის მიტროპოლიტი ისაია (ჭანტურია) აცხადებს, რომ ახალი პატრიარქის არჩევნებამდე „ჯერ შორია“, კანდიდატურა არავის დაუსახელებია და შესაბამისად, ვერ მოხსნიდა.

„ინტერპრესნიუსის“ ჟურნალისტის კითხვაზე, ადასტურებს თუ არა ინფორმაციას, რომ კანდიდატურა მოხსნა და დააყენებს თუ არა კანდიდატურას, მიტროპოლიტმა განაცხადა, რომ დრო აჩვენებს.

„ჯერ შორი დროა არჩევნებამდე, ამიტომ ჯერ არავის დაუსახელებია ვინმე კანდიდატად, ამიტომაც ჯერ ვერავინ მოხსნიდა თავის კანდიდატურას, მგონია, გასაგებად ვამბობ…

დანარჩენს კი დრო გამოაჩენს, რა როგორ იქნება“, - აცხადებს მიტროპოლიტი.

ცნობისთვის, სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე 17 მარტს გარდაიცვალა. 18 მარტიდან სამების ტაძარში მისი სამოქალაქო პანაშვიდი მიმდინარეობდა. უწმინდესის ხსოვნას ათასობით მოქალაქემ პატივი მიაგო. ილია მეორე 22 მარტს, სიონის საპატრიარქო ტაძარში დაკრძალეს.

ილია მეორის გარდაცვალების შემდეგ წმინდა სინოდმა ახალი პატრიარქი უნდა აირჩიოს. ჯერჯერობით კანდიდატები ოფიციალურად არ დასახელებულან, თუმცა გავრცელდა ცნობები, რომ საკუთარი კანდიდატურა მიტროპოლიტმა ისაიამ მოხსნა საპატრიარქო ტახტის მოსაყდრის, მიტროპოლიტ შიოს (მუჯირი) სასარგებლოდ.