„სტრატეგია აღმაშენებელი“ - პატრიარქის არჩევა მხოლოდ წმინდა სინოდის პრეროგატივაა, ამ პროცესში პოლიტიკური სუბიექტების ჩარევა დაუშვებელია
პატრიარქის არჩევა მხოლოდ წმინდა სინოდის პრეროგატივაა, ამ პროცესში პოლიტიკური სუბიექტების ჩარევა დაუშვებელია, - ამის შესახებ განცხადებას „სტრატეგია აღმაშენებელი“ ავრცელებს.
„სტრატეგია აღმაშენებელი“ მოუწოდებს „ქართულ ოცნებას“, შეწყვიტოს საეკლესიო გადაწყვეტილებებზე გავლენის მოხდენის მცდელობა.
„ახალი პატრიარქის არჩევის პროცესთან დაკავშირებით, ჩვენი მკაფიო პოზიციაა: პოლიტიკური სუბიექტების ჩარევა ამ პროცესში დაუშვებელია. პატრიარქის არჩევა მხოლოდ წმინდა სინოდის პრეროგატივაა.
ჩვენ წინასწარ ვადასტურებთ პატივისცემას მათ მიერ მიღებული ნებისმიერი გადაწყვეტილების მიმართ.
ვხედავთ „ქართული ოცნების" მხრიდან აშკარა ჩარევას საჯარო კომუნიკაციისა და საინფორმაციო კამპანიების მეშვეობით. მოვუწოდებთ რეჟიმს, შეწყვიტოს საეკლესიო გადაწყვეტილებებზე გავლენის მოხდენის მცდელობა და ინსტიტუტის ინსტრუმენტალიზაცია.
საქართველოს ეკლესიას ავტოკეფალიის მრავალსაუკუნოვანი გამოცდილება აქვს. ის სრულად უნდა იყოს დაცული პოლიტიკური წნეხისგან“, - ნათქვამია განცხადებაში.
