ქობულეთში, სოფელ ბობოყვათში ადგილობრივმა მოსახლეობამ და ე.წ უსახლკარო პირებმა საპროტესტო აქცია გამართეს. აქციის მონაწილეების განცხადებით, აღნიშნულ ტერიტორიაზე ბიზნესმენი გიორგი რამიშვილი მრავალბინიან საცხოვრებელ კორპუსებს აშენებს.

შეკრებილები ხელისუფლებას და ბიზნესის წარმომადგენლებს მოუწოდებენ, რომ აღნიშნული ოჯახების საკითხის ინდივიდუალური შესწავლა და მათი დაკმაყოფილება უნდა მოხდეს.

აქციის მონაწილეები ხელისუფლებას მიმართავენ და დახმარებას ითხოვენ.

„ბიზნესი და ხელისუფლება ისე კარგად შეხმატკბილდნენ ერთმანეთში, საერთოდ დაავიწყდნენ სოციალური პასუხისმგებლობა.

სოციალური პასუხისმგებლობის ფარგლებში, ჩვენ მივმართავთ ხელისუფლებას და ბიზნესს, რომ აიღონ პასუხისმგებლობა, რათა აჭარაში უსახლკარო ოჯახები არ იყოს. ბიზნესმენ გიორგი რამიშვილს მივმართავ: ის ვერ შეძლებს აქ ერთი ტექნიკის შემოყვანას და მშენებლობის დაწყებას, მანამ სანამ ამ ოჯახების დაკმაყოფილება არ მოხდება, რომლის პირობა მას ჰქონდა და არ შეასრულა“, - აცხადებს უფლებადამცველი თამაზ ბაკურიძე.