რაც შეეხება ილჰამ ალიევის ვიზიტს, ივანიშვილი ხვდება მათ, ვისთანაც მისი პირადი ქონებრივი ინტერესია, - ამის შესახებ „თავისუფლების მოედნის“ ერთ-ერთმა ლიდერმა, ლევან ცუცქირიძემ „პალიტრანიუსის“ გადაცემაში „თავისუფალი სტუდია“ განაცხადა, რითაც აზერბაიჯანის პრეზიდენტის, ილჰამ ალიევის საქართველოში ვიზიტსა და „ქართული ოცნების“ საპატიო თავმჯდომარესთან, ბიძინა ივანიშვილთან შეხვედრას გამოეხმაურა.

ლევან ცუცქირიძის თქმით, არ არის გამორიცხული, რომ ივანიშვილისა და ალიევის შეხვედრაზე ისეთი მნიშვნელოვანი საკითხებიც ყოფილიყო განხილული, როგორიცაა რეგიონში მიმდინარე „დრამატული ცვლილებები“.

„როგორც ჩანს, აქ უფრო მეტად იყო ივანიშვილის ფაქტორიც და ინტერესიც, თუმცა არ გამოვრიცხავ, რომ სხვა მნიშვნელოვანი საკითხებიც განხილულიყო. მოგეხსენებათ, მთელი რეგიონი დრამატული ცვლილებების წინაშეა.

ჩვენი რეგიონი ვეღარ იქნება ისეთი, როგორიც იყო, სომხეთ-აზერბაიჯანის ურთიერთობების გამო, რუსეთის ინტერესების შევიწროების გამო, ასევე, იმის გამო, რაც ირანში ხდება. ამიტომაც არჩევანი გვექნება გასაკეთებელი, სად დგას საქართველო დიდ პროექტებში, დიდ გეოპოლიტიკურ გადაწყობაში, რაც ჩვენი ქვეყნისთვის შეიძლება ძალიან სწრაფი განვითარების ამბავი იყოს”, - აცხადებს ცუცქირიძე.

ამასთან, ცუცქირიძის თქმით, მიუხედავად ბიძინა ივანიშვილის კერძო ინტერესებისა, რეგიონში ამერიკული და დასავლურ ინტერესების ზრდის პირობებში „ქართულ ოცნებას“ მოუწევს არჩევანის გაკეთება.

„აქ არის კერძო, კორუმპირებული, ფინანსური ინტერესები, რომლის დაკმაყოფილებასაც ცდილობენ, მაგრამ ამერიკული და დასავლური ინტერესების ზრდა „ოცნებას“ დილემის წინაშე დააყენებს, მას მოუწევს არჩევანის გაკეთება, თუმცა აქამდე სწორი არჩევანი არ გაუკეთებია“, - განაცხადა ლევან ცუცქირიძემ.

ლევან ცუცქირიძე საქართველოში ამერიკის შეერთებული შტატების დელეგაციის მოსალოდნელ ვიზიტსაც გამოეხმაურა, რომლის შესახებაც „ქართული ოცნების“ ლიდერები საუბრობენ.

ცუცქირიძის თქმით, თუ ჩამოვა რაიმე სახის დელეგაცია, რომელიც საქართველოში სიტუაციას დააკვირდება და შეისწავლის, ის ამას მიესალმები.

„ჯერ არ ვიცით, იქნება თუ არ იქნება, რომც იყოს, საინტერესოა. ჩვენც შევხვდებით ამ დელეგაციას. თუ ჩამოვა რაიმე სახის დელეგაცია, რომელიც აქ სიტუაციას დააკვირდება და შეისწავლის, მე ამას მივესალმები. მე მგონი, ეს ძალიან კარგი იქნება ჩვენი ქვეყნისთვის და ამ ადამიანებს, რა თქმა უნდა, ჩვენც გავუზიარებთ ჩვენს პოლიტიკურ შეხედულებებს“, - განაცხადა ლევან ცუცქირიძემ.