თბილისის საქალაქო სასამართლოში, ათონელის სასახლესთან, 4 ოქტომბერს განვითარებულ მოვლენებთან დაკავშირებით დაკავებული კახაბერ კვაჭანტირაძის, სიმონ მახარაძისა და კიდევ 11 პირის სასამართლო პროცესი მიმდინარეობს.

დღევანდელ პროცესს არ ესწრება ორი ბრალდებული: ავთანდილ გიუნაშვილი და ბექა მაჭავარიანი. მოსამართლე თამარ მახარობლიძის განმარტებით, პენიტენციური დაწესებულებიდან წარმოდგენილი ოქმის თანახმად, მათ არ სურთ დღევანდელ სხდომაში მონაწილეობა.

დღევანდელი პროცესი პროკურატურის მტკიცებულებების გამოკვლევით გრძელდება. ამ წუთებში მოწმის სახით იკითხება მთავარი გამომძიებელი კონსტანტინე კერესელიძე, რომლის თქმითაც, აღნიშნულ სიახლის სამართლის საქმეზე პირველმა ჩაატარა საგამოძიებო მოქმედებები, შემდეგ კი საქმე რამდენიმე ეპიზოდად დაიყო.

ცნობისთვის, კახაბერ კვაჭანტირაძეს, სიმონ მახარაძეს, გია თოლორაიას, ავთანდილ თოფჩიშვილს, მიხეილ თოლორაიას, იური ლომიძეს, გიორგი ტალახაძეს, დავით გიუნაშვილს, საბა კორძაიას, გიორგი კირვალიძეს, კობა ეპიტაშვილს, მანუჩარ მიქელაძეს და ბექა მაჭავარიანს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის „ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილითაც აქვს წარდგენილი, რაც ჯგუფურ ძალადობაში მონაწილეობას გულისხმობს.