თამამად შეგვიძლია ვთქვათ, რომ არცერთ საგრანტო პროექტზე, რომელიც საქართველოს ეროვნული ინტერესების წინააღმდეგ არ იყო, უარი არ თქმულა - 2025 წლის 16 აპრილიდან, 2026 წლის 8 აპრილის ჩათვლით, მთავრობის ადმინისტრაციაში წარდგენილი განაცხადებიდან გადაწყვეტილება მიღებულია 165 საგრანტო განაცხადთან დაკავშირებით და დადებითი რეკომენდაციის მაჩვენებელი არის 95%-ზე მეტი - ამ სტატისტიკაზე პარლამენტის პლენარულ სხდომაზე საგარეო საქმეთა მინისტრმა მაკა ბოჭორიშვილმა ისაუბრა.

ბოჭორიშვილმა განაცხადა ისიც, რომ პარლამენტის მიერ 2024–2025 წლებში მიღებულ კანონები პოლიტიკაში უცხოური ჩარევების პრევენციასა და უცხოური გავლენის გამჭვირვალობას ისახავს მიზნად და ამ კანონების გამო არცერთი პროექტი არ შეჩერებულა და გაუქმებულა.

“ვფიქრობ, დღეს აღარავის უნდა ჰქონდეს კითხვა პოლიტიკაში უცხოური ჩარევების პრევენციის და უცხოური გავლენების გამჭვირვალობის აუცილებლობასთან დაკავშირებით. დღეს თვალნათლივ ჩანს, თუ რამდენად უკავშირდება ყოველივე ეს ჩვენი ქვეყნის უსაფრთხოებას და სტაბილურობას”, - განაცხადა მაკა ბოჭორიშვილმა.

ბოჭორიშვილი პარლამენტში ინტერპელაციის ფორმატში იმყოფება. საგარეო საქმეთა მინისტრი ფრაქციამ “საქართველოსთვის“ მიიწვია.