კონკურენციის და მომხმარებლის დაცვის სააგენტოსა და საქართველოს ადვოკატთა ასოციაციას შორის ურთიერთგაგების მემორანდუმი გაფორმდა
კონკურენციის და მომხმარებლის დაცვის სააგენტოსა და საქართველოს ადვოკატთა ასოციაციას შორის ურთიერთგაგების მემორანდუმი გაფორმდა. ინფორმაციას კონკურენციის და მომხმარებლის დაცვის სააგენტო ავრცელებს.
მათივე ცნობით, დოკუმენტს ხელი მოაწერეს GCCA-ის თავმჯდომარე ირაკლი ლექვინაძემ და ადვოკატთა ასოციაციის თავმჯდომარე ირაკლი ყანდაშვილმა.
„მემორანდუმის მიზანია ინსტიტუციური თანამშრომლობის გაძლიერების ხელშეწყობა და კონკურენციის სამართლის, ანტიდემპინგის მიმართულებისა და მომხმარებელთა უფლებების დაცვის სფეროში პროფესიული სტანდარტების განვითარება, მათ შორის საქართველოს ადვოკატთა ასოციაციის კონკურენციის სამართლის კომიტეტის ჩართულობით.
მემორანდუმი გულისხმობს კონკურენციის სამართლისა და მომხმარებელთა უფლებების დაცვის სფეროში ეფექტიანი თანამშრომლობის ჩამოყალიბებას, სამართლებრივი პრაქტიკის გაუმჯობესებას, აღნიშნული მიმართულებებით ადვოკატთა პროფესიული კვალიფიკაციის ამაღლებას და საზოგადოებაში ცნობიერების გაზრდას.
მემორანდუმის თანახმად, თანამშრომლობის ფარგლებში, დაორგანიზდება ერთობლივი ტრენინგები, სემინარები და კონფერენციები, შემუშავდება პრაქტიკული სახელმძღვანელოები, რეკომენდაციები და კვლევები, გაანალიზდება კონკურენციის სამართლის პრაქტიკა და გაზიარდება საუკეთესო პრაქტიკა, განხორციელდება საინფორმაციო კამპანიები მომხმარებელთა უფლებების დაცვის საკითხებზე, ასევე, ხელი შეეწყობა პროფესიულ დიალოგს კერძო და საჯარო სექტორებს შორის“, - აღნიშნულია ინფორმაციაში.
