პარტია “ევროპული საქართველოს“ თავმჯდომარის, გიგი წერეთლის ინფორმაციით, „ოპოზიციურმა ალიანსმა“ საქართველოში დიდი ბრიტანეთის ელჩს საკუთარი გეგმები გააცნო.

როგორც წერეთელმა შეხვედრის დასრულების შემდეგ განაცხადა, დიპლომატიურ კორპუსთან შეხვედრა იმ მუშაობის ნაწილია, რასაც ოპოზიცია ეწევა და რაც არის ჩვეულებრივი ამბავი.

მისი თქმით, ყველა დიპლომატს, ვინც საქართველოშია, ქვეყანაში შექმნილი ვითარება უნდა აწუხებდეს.

“ვხედავთ ძალიან ღია გზავნილებს. დღევანდელი სისტემა, რომელიც არის შექმნილი და პოლიტიკა, რასაც ჩვენ ვხედავთ, იმის საწინააღმდეგოა, რა მიზნებიც ჩვენი საზოგადოების ძალიან დიდ ნაწილს აქვს და რაც ჩვენ კონსტიტუციაში გვიწერია, რომ ვიყოთ დასავლური ტიპის ქვეყანა, გვქონდეს დემოკრატია, თავისუფალი არჩევნები, არ გვყავდეს პოლიტიკური პატიმრები და ქვეყანა ეკონომიკურად ისე ვითარდებოდეს, რომ რუსეთზე არ იყოს დამოკიდებული.

რა თქმა უნდა, დიდი ბრიტანეთი არის საქართველოს ერთ-ერთი ძალიან მნიშვნელოვანი პარტნიორი, მხარდამჭერი. ინტერესი არსებობს და სწორედ ეს იყო შეხვედრის ძირითადი საფუძველი“, - განაცხადა გიგი წერეთელმა.