არ მახსოვს შემთხვევა, რომ თუნდაც ახალი სამინისტროს შექმნის შემთხვევაში, პარლამენტში შემოსულიყო დასამტკიცებლად და პარლამენტს მიეღო გადაწყვეტილება, რომ არ ყოფილიყო წარმოდგენილი და პარლამენტმა არ იცოდეს მისი ფუნქციები, უფლება-მოვალეობები, შტატები, ბიუჯეტი,- ამის შესახებ პარტია „გახარია საქართველოსთვის“ დეპუტატმა, შალვა კერესელიძემ სამართალდამცავი ორგანოების კოორდინაციის საკითხებში სახელმწიფო მინისტრის თანამდებობასთან დაკავშირებით განაცხადა.

მან მთავრობის საპარლამენტო მდივანს ვახტანგ ბაჩიაშვილს, რომელიც პარლამენტის პლენარულ სხდომაზე საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ კანონში ცვლილებები წარადგენს, კითხვით მიმართა, რამდენად სამართლიანად მიაჩნია, საქართველოს პარლამენტის მხრიდან ისეთი უწყების შექმნის მხარდაჭერა, რომელზეც არაფერი ცნობილი არ არის.

„ამ პარლამენტში, წინა მოწვევის პარლამენტშიც და გასული წლების პარლამენტშიც ძალიან ხშირად ყოფილა შემთხვევები, როდესაც ახალი უწყება შექმნილა, გაყოფილა სამინისტროები, სახელმწიფო მინისტრის აპარატები დამატებულა, გაუქმებულა, მთავრობები დამტკიცებულა, მაგრამ მე არ მახსოვს შემთხვევა, რომ თუნდაც ახალი სამინისტროს შექმნის შემთხვევაში, სახელმწიფო მინისტრის იქნება, თუ ისე, პარლამენტში შემოსულიყო დასამტკიცებლად და პარლამენტს მიეღო გადაწყვეტილება ისე, რომ არ ყოფილიყო წარმოდგენილი და პარლამენტმა არ იცოდეს მისი ფუნქციები, უფლება-მოვალეობები, შტატები, ბიუჯეტი. თქვენ როგორც იურისტს და საპარლამენტო მდივანს, რამდენად სამართლიანად მიგაჩნიათ, რომ დღეს საქართველოს პარლამენტმა მიიღოს გადაწყვეტილება ისეთი უწყების, სახელმწიფო მინისტრის, რომელიც პარალელურად უნდა იყოს ვიცე-პრემიერის სტატუსით შემკობილი, რომლის ფუნქციები ოფიციალურად განსაზღვრული არ არის. დღეს რჩება შთაბეჭდილება, რომ საქართველოს მთავრობაში იქმნება სახელმწიფო მინისტრის აპარატი, აპარატიც არ იქმნება და არ ვიცით ფუნქციები, იქ ინიშნება სუს-ის ყოფილი ხელმძღვანელი და გარკვეული არ არის არაფერი. ერთადერთი რაც ვიცით, კანონის გათვალისწინებით ანზორ ჩუბინიძის სახელმწიფო დაცვის სამსახურის იმედად არის დარჩენილი სუს-ის ყოფილი ხელმძღვანელი, დანარჩენი არაფერი არ ვიცით“,- განაცხადა შალვა კერესელიძემ.