აჭარის მთავრობის თავმჯდომარის კანდიდატთან დაკავშირებით საქართველოს პრეზიდენტს აჭარის უმაღლეს საბჭოში „გახარია-საქართველოსთვის“ წევრებთან კონსულტაციისთვის არ მიუმართავს, - ამის შესახებ აჭარის უმაღლეს საბჭოში „გახარია-საქართველოსთვის“ წევრმა არჩილ სამნიძემ ჟურნალისტებთან საუბრისას განაცხადა. მისივე თქმით, შესაბამისად, ზურაბ პატარაძის თანამდებობაზე დასამტკიცებლად კენჭისყრაში მონაწილეობა არ მიიღეს.

„კენჭისყრის პროცედურაში მონაწილეობისგან თავი შევიკავეთ, რადგან პირველივე დღიდან კონსტიტუციის დარღვევით მოხდა თავმჯდომარეობის კანდიდატის წარდგენა, რადგან კონსტიტუციის მეოთხე მუხლში პირდაპირ სიტყვასიტყვით არის ჩანაწერი, რომ საქართველოს პრეზიდენტმა უნდა გამართოს კონსულტაციები მთავრობის თავმჯდომარეობის კანდიდატურასთან დაკავშირებით, უმაღლეს საბჭოში წარმოდგენილ პოლიტიკურ პარტიებთან. აღნიშნული კონსულტაციებისთვის ჩვენთვის ე.წ პრეზიდენტს არ მოუმართავს, შესაბამისად, ჩვენ მივიღეთ გადაწყვეტილება, რომ კენჭისყრის პროცედურისგან თავი შეგვეკავებინა. რაც შეეხება ბატონო პატარაძესთან შეკითხვებს, კითხვა ეხებოდა იმ კამპანიას „გარეჯი საქართველოა“. კი, გიდასტურებთ გარეჯი არის საქართველო და ის ჩვენი ეროვნული ტკივილია.

ზურაბ პატარაძე საქართველოს ინტერესებს წარმოადგენდა აზერბაიჯანში, ჩემი კონკრეტული კითხვა მდგომარეობდა შემდეგში, რომ კონკრეტული საკითხი დაისვა თუ არა, გადაიდგა თუ არა რაიმე ქმედითი ნაბიჯი, - რაზეც კონკრეტული პასუხი ვერ გამცა და სამომავლო იმედი გამოთქვა აღნიშნულო საკითხის დარეგულირებისთვის”,- განაცხადა არჩილ სამნიძემ.