ათენში 89 წლის მამაკაცმა ცეცხლი გახსნა, რის შედეგადაც, ხუთი ადამიანი დაშავდა, - ინფორმაციას ბერძნული მედია ავრცელებს.

ადგილობრივი მედიის ინფორმაციით, დღეს დილით მამაკაცმა სანადირო თოფით ცეცხლი ათენში, საბერძნეთის სოციალური დაზღვევის სააგენტო EFKA-ს ერთ-ერთ ფილიალში გახსნა, რის შედეგადაც, ერთი თანამშრომელი ფეხში დაიჭრა.

ამის შემდეგ თავდამსხმელმა შემთხვევის ადგილი ტაქსით დატოვა და სააპელაციო სასამართლოს შენობაში მივიდა, სადაც ცეცხლი კვლავ გახსნა და ოთხი თანამშრომელი დაშავდა.

თვითმხილველების ცნობით, თავდამსხმელმა შემთხვევის ადგილზე იარაღი და წერილები დატოვა. მათი თქმით, თავდამსხმელმა შემთხვევის ადგილის დატოვებამდე განაცხადა, რომ წერილები გაზეთებისთვის იყო განკუთვნილი და მათში თავდასხმის მიზეზებია ახსნილი.

დაშავებულები საავადმყოფოში გადაიყვანეს. მათ სიცოცხლეს საფრთხე არ ემუქრება.

ათენის პოლიცია თავდასხმაში ეჭვმიტანილ 89 წლის მამაკაცს ამ დრომდე ეძებს.