ფრიდრიხ მერცი - დონალდ ტრამპთან ჩემი ურთიერთობა კვლავ კარგია
დონალდ ტრამპთან ჩემი ურთიერთობა კვლავ კარგია, - ამის შესახებ გერმანიის კანცლერმა, ფრიდრიხ მერცმა განაცხადა.
„ჩემი გადმოსახედიდან, აშშ-ის პრეზიდენტთან ჩემი ურთიერთობა კვლავ კარგი რჩება. მე უბრალოდ თავიდანვე ეჭვები მქონდა, თუ რა მოხდა ირანში ომის დაწყებით. სწორედ ამის გამო საკუთარი აზრი მკაფიოდ დავაფიქსირე“, - განაცხადა გერმანიის კანცლერმა.
მერცის თქმით, ირანში ომით გამოწვეულ შედეგებს გერმანია და ევროპა გრძნობს.
„ჰორმუზის სრუტის დახურვა პირდაპირ გავლენას ახდენს ჩვენს ენერგომომარაგებასა და ეკონომიკურ მაჩვენებლებზე“, - აღნიშნა ფრიდრიხ მერცმა.
ცნობისთვის, აშშ-ის პრეზიდენტმა, დონალდ ტრამპმა გერმანიის კანცლერი, ფრიდრიხ მერცი ირანში ომთან დაკავშირებით მისი პოზიციის გამო გააკრიტიკა.
„გერმანიის კანცლერი ფრიდრიხ მერცი მიიჩნევს, რომ ირანის მიერ ბირთვული იარაღის ფლობა დასაშვებია. მან არ იცის, რას ლაპარაკობს“, - დაწერა ტრამპმა სოციალურ ქსელში.
მანამდე, ფრიდრიხ მერცმა განაცხადა, რომ აშშ-ს ირანთან მოლაპარაკებებში მკაფიო სტრატეგია არ აქვს.
„ვერ ვხედავ, კონფლიქტიდან გამოსვლის რა სტრატეგიას ირჩევენ ამერიკელები. ნათელია, რომ მოლაპარაკებებში ირანელები ძალიან გამოცდილები არიან, ან უფრო ზუსტად იმაში, რომ მოლაპარაკებები არ აწარმოონ“, - განაცხადა გერმანიის კანცლერმა.
