ჩინეთის საგარეო საქმეთა მინისტრის ვან ის განცხადებით, პეკინმა და ვაშინგტონმა ჩინეთ-აშშ-ის ურთიერთობებში რთულად მოპოვებული სტაბილურობა უნდა შეინარჩუნონ.

ჩინეთის საგარეო საქმეთა სამინისტროს ცნობით, ეს განცხადება ვან იმ აშშ-ის სახელმწიფო მდივანთან, მარკო რუბიოსთან სატელეფონო საუბრისას გააკეთა.

„ორივე მხარემ უნდა დაიცვას ძნელად მოპოვებული სტაბილურობა, კარგად მოემზადოს მაღალი დონის ურთიერთობებისთვის, გააფართოვოს თანამშრომლობის სფეროები და მოაგვაროს თავიანთი უთანხმოებები“, - განუცხადა ვანმა რუბიოს.

ჩინეთის საგარეო საქმეთა სამინისტროს ცნობით, ვან იმ „ხაზგასმით აღნიშნა, რომ ტაივანის საკითხი ჩინეთის ძირითად ინტერესებს ეხება და ჩინეთ-აშშ-ის ურთიერთობებში ყველაზე დიდ რისკს წარმოადგენს“.

„შეერთებულმა შტატებმა უნდა შეასრულოს თავისი ვალდებულებები და გააკეთოს სწორი არჩევანი, გახსნას ახალი პერსპექტივები ორმხრივი თანამშრომლობისთვის და შეასრულოს თავისი წვლილი მსოფლიო მშვიდობის ხელშეწყობაში“, - აღნიშნა ჩინეთის საგარეო უწყების ხელმძღვანელმა.

ჩინეთის საგარეო საქმეთა სამინისტროს განცხადებაში ნათქვამია, რომ სატელეფონო საუბრის დროს ვანმა და რუბიომ ახლო აღმოსავლეთში არსებულ ვითარებასთან დაკავშირებით მოსაზრებები გაცვალეს.

ცნობისთვის, აშშ-ის პრეზიდენტი დონალდ ტრამპი 14-15 მაისს ჩინეთში ვიზიტს გეგმავს, სადაც პრეზიდენტ სი ძინპინს შეხვდება.