პროცესი იყო ძალიან გამჭვირვალე, შედეგი დადგა ისეთი, როგორიც დადგა, - ამის შესახებ ბელგიისა და ჰოლანდიის ეპარქიის ეპისკოპოსმა, მეუფე დოსითეოს ბოგვერაძემ „პალიტრანიუსის“ გადაცემაში „360 გრადუსი“ წმინდა სინოდის სხდომის დეტალებზე საუბრისას განაცხადა, სადაც სამი საპატრიარქო კანდიდატი გამოარჩიეს.

მეუფე დოსითეოსის განცხადებით, წმინდა სინოდმა თავისი შინაგანი რწმენით გამოხატა თავისი დამოკიდებულება და რაიმე გაუგებრობას ადგილი არ ჰქონია.

„არ მგონია, რომ რაიმე განსაკუთრებული მოხდა, სინოდმა თავისი შინაგანი რწმენით გამოხატა ის დამოკიდებულება, რაც გამოხატა. არ ვფიქრობ, რომ აქ რამე გაუგებრობას ჰქონდა ადგილი. პროცესი იყო ძალიან გამჭვირვალე, შედეგი დადგა ისეთი, როგორიც დადგა. არის ასეთი მოსაზრება, რომ თეორიულად რაიმე კიდევ მცირედით შეიცვალოს, ამის შესაძლებლობა ალბათ ყოველთვის არის, მაგრამ შედეგი ისეთია, როგორიცაა და სინოდის ყველა წევრი ეთანხმება ამ შედეგს. სხვაგვარი ფიქრისთვის ადგილი არ რჩება“, - განაცხადა მეუფე დოსითეოსმა.

რაც შეეხება მიტროპოლიტ ისაიას წერილს მართვა-გამგეობის დებულებაში საპატრიარქო კანდიდატისთვის განათლების კრიტერიუმის შესახებ, მეუფე დოსითეოსი აცხადებს, რომ მეუფე ისაიას წერილი იყო პრეცედენტი.

„მეუფე ისაიას წერილი იყო პრეცედენტი. ძალიან გულწრფელი და საინტერესო წერილი იყო იმ გაგებით, რომ შეიძლება ფორმალობაა დებულების მოთხოვნა, მაგრამ ეს მაინც სამართლებრივი ძეგლია, სამართლებრივი საკითხია. სწორი მინიშნება იყო და საბოლოოდ ამან უბიძგა იმ მომენტს, რომ ეს დებულება ფაქტობრივად შესაცვლელი დებულებაა. ამ დებულების ნაკლოვანების წარმოჩენაც მოხდა ამ წერილით. მეუფე ისაია ერთგვარ ლაკმუსად იქცა იმ გამოწვევებისა, რაც ამ დებულებაში ამ ჩანაწერს მოჰყვა.

სინოდზე გარკვევით ითქვა კანდიდატებისგანაც და სინოდის თავმჯდომარისგანაც, სინოდის უმრავლესობა, შეიძლება ითქვას 100%-მდე, დარწმუნებულია იმაში, რომ მართვა-გამგეობის ახალი დებულება იქნება საჭირო“, - განაცხადა მეუფე დოსითეოსმა.