დიუშენის კუნთოვანი დისტროფიით დაავადებული ბავშვების მშობლები საპროტესტო აქციას მართავენ. ისინი რუსთაველის მეტროსთან შეიკრიბნენ, საიდანაც მთავრობის ადმინისტრაციამდე მსვლელობით მიემართებიან.

აქციის მონაწილეები სკანდირებენ: "მიეცით წამალი ბავშვებს! წამალი ბავშვებს! მიეცით ბავშვებს წამალი”, „შენი შვილი რომ იყოს?!".

საპროტესტო აქციის მონაწილეები დიუშენის კუნთოვანი დისტროფიით დაავადებული ბავშვებისთვის საჭირო მედიკამენტს მოითხოვენ. აქციის მონაწილეებს სიმბოლურად წითელი ბუშტები და საპროტესტო ბანერები აქვთ. მსვლელობას თან მიჰყვებიან პოლიციის ეკიპაჟები.

როგორც ერთ-ერთმა მშობელმა თაკო გოგალაძემ ჟურნალისტებს განუცხადა, საპროტესტო აქციები მანამდე გაგრძელდება, სანამ ბავშვები საჭირო მედიკამენტს არ მიიღებენ.

"ეს მარში ემსახურება დიუშენის კუნთოვანი დისტროფიით დაავადებულ ბავშვებს და იმ მოთხოვნას, რომ უკვე ორი წელი გახდება, რაც მედიკამენტს ვითხოვთ. ეს ამ ბავშვებისთვის სასიცოცხლოდ მნიშვნელოვანია, რადგან დაავადება არის ფატალური. ჩვენი ერთადერთი და მკაფიო მოთხოვნა არის, დროულად მიეცეთ ბავშვებს წამალი, რათა მათი სიცოცხლე გახანგრძლივდეს.

ყოველ კვირას, 18:00 საათიდან დავაანონსებთ დიუშენის კუნთოვანი დისტროფიით დაავადების მქონე ბავშვების მხარდამჭერ მარშს.

ასევე, ყოველ ორშაბათს, 17:00 საათზე გაიმართება აქცია კანცელარიასთან. აქცია მანამდე გაგრძელდება, სანამ ჩვენი მოთხოვნა არ დაკმაყოფილდება და ბავშვები არ მიიღებენ იმ მედიკამენტებს, რომლისთვისაც ასე ვიბრძვით. ბავშვები ყოველდღიურ რეჟიმში ელოდებიან, რომ მათი მდგომარეობა სასიკეთოდ შეიცვლება",-განაცხადა თაკო გოგალაძემ.

მისი თქმით, ჯანდაცვის მინისტრი მიხეილ სარჯველაძე საზოგადოებას ატყუებს.

"საზოგადოების დიდმა ნაწილმა არ იცის, რას ვებრძვით ყოველდღიურად. მინისტრმა ჩვენგან გაიგო ამ დაავადების შესახებ. ჩვენ უკვე 10 წელია ამ მედიკამენტებს თვალს ვადევნებთ, როგორ აღიარეს. ეს არის ის პროპაგანდა, რომლითაც ცდილობენ საზოგადოება შეცდომაში შეიყვანონ. მშობლები ვებრძვით ჩვენი შვილების ფატალურ დაავადებას, ამ დროს ჯანდაცვის მინისტრი გამოდის და ამბობს, რომ თურმე ჩვენ ჩვენი შვილებისთვის კარგი არ გვინდა და ამ წამალს შედეგი არ აქვს. დაავადება კლავს ბავშვებს. ეს არის რეალობა. კრიტიკულად მნიშვნელოვანია, მოკლე დროში შემოიტანონ ეს მედიკამენტები. ეს ადამიანი უკვე დამნაშავეა, ჩვენ მასთან ორი წელი ცივილურად ვსაუბრობდით, მაგრამ გვატყუებდა, ორი წელი მოგვპარა და დაგვაკარგვინა, რაც ამ ბავშვებთან მიმართებით სერიოზული დანაშაულია. ორი წელი ამ ბავშვებისთვის ნიშნავს, რომ -2 წელი აქვთ ცხოვრება“, - განაცხადა თაკო გოგალაძემ.