მთავრობის ადმინისტრაციასთან, სადაც დიუშენის კუნთოვანი დისტროფიით დაავადებული ბავშვების მშობლების აქცია მიმდინარეობდა, ხმაური იყო.

აქციის მონაწილეებისა და სამართალდამცველების დაპირისპირება მთავრობის ადმინისტრაციის წინ, სკვერში „პუფების“ შეტანის მცდელობას მოჰყვა. მშობლები ცდილობდნენ, ადგილზე ღამის გათევისთვის საჭირო პუფების შეტანას, რის საშუალებასაც ადგილზე მობილიზებული პოლიცია არ აძლევდა.

ამის შემდეგ ხმაური მშობლების შენობაში შესვლის მცდელობას მოჰყვა. ისინი მთავრობის ადმინისტრაციაში შესვლასა და მთავრობის მეთაურის წარმომადგენელთან შეხვედრას ითხოვდნენ, თუმცა დაცვის წევრებმა ისინი შენობაში არ შეუშვეს.

უკვე ორი კვირაა, მთავრობის ადმინისტრაციასთან დიუშენით დაავადებული ბავშვების მშობლები ღამეებს ათენებენ და სახელმწიფოსგან ითხოვენ სამკურნალო მედიკამენტს, რომელიც, მათი განცხადებით, ბავშვების მდგომარეობას გააუმჯობესებს.