სრულ სოლიდარობას ვუცხადებ მოჰამედ ბინ ზაიედსა და არაბთა გაერთიანებული საამიროების ხალხს ირანის მიერ სამოქალაქო ინფრასტრუქტურაზე რაკეტებით და დრონებით განხორციელებული უსამართლო თავდასხმების შემდეგ, - ამის შესახებ ევროპული საბჭოს პრეზიდენტი ანტონიო კოშტა სოციალურ ქსელში წერს.

მისი განცხადებით, სუვერენიტეტისა და საერთაშორისო სამართლის ეს დარღვევები მიუღებელია და უნდა შეწყდეს.

„ირანი უნდა ჩაერთოს მოლაპარაკებებში, რათა უზრუნველყოს ახლო აღმოსავლეთში ცეცხლის შეწყვეტის რეჟიმის შენარჩუნება. ევროკავშირი გააგრძელებს მუშაობას ჩვენს პარტნიორებთან დეესკალაციის, ჰორმუზის სრუტის ხელახლა გახსნისა და რეგიონული უსაფრთხოებისთვის მდგრადი დიპლომატიური გადაწყვეტის მისაღწევად“, - აცხადებს კოშტა.

აშშ-ირანს შორის ცეცხლის შეწყვეტის შეთანხმების მიღწევის შემდეგ პირველად, ირანმა არაბთა გაერთიანებულ საამიროებს დრონებით და რაკეტებით შეუტია. არაბთა გაერთიანებულო საამიროების თავდაცვის სამინისტროს ცნობით, ქვეყნის საჰაერო თავდაცვის ძალებმა ირანიდან გაშვებული 19 რაკეტა და უპილოტო საფრენი აპარატი მოიგერიეს. არაბთა გაერთიანებულ საამიროების მთავრობის პრესსამსახურში აცხადებენ, რომ დრონებით განხორციელებული თავდასხმის შემდეგ, ფუჯაირას ნავთობის ინდუსტრიის ზონაში ხანძარი გაჩნდა. თავდასხმის შედეგად ინდოეთის სამი მოქალაქე დაშავდა და საავადმყოფოში გადაიყვანეს.