რუმინეთის პარლამენტმა ქვეყნის მთავრობას უნდობლობა გამოუცხადა, - ინფორმაციას რუმინული გამოცემა Digi24 ავრცელებს.

რუმინეთის პარლამენტში დეპუტატებმა „სოციალ-დემოკრატიული პარტიისა“ და ულტრამემარჯვენეების მიერ ქვეყნის პრემიერ-მინისტრის, ილიე ბოლოჟანის მთავრობისთვის უნდობლობის გამოცხადების საკითხზე ინიცირებულ წინადადებას მხარი დაუჭირეს.

წინადადებას მხარი 281-მა დეპუტატმა დაუჭირა. უნდობლობის გამოცხადებისთვის კი 233 ხმა იყო საჭირო.

ცნობისთვის, რუმინეთში პოლიტიკური კრიზისი მმართველი კოალიციის დაშლის შემდეგ დაიწყო. 20 აპრილს ილიე ბოლოჟანის მმართველ კოალიციაში შემავალმა „სოციალ-დემოკრატიულმა პარტიამ“ პრემიერ-მინისტრისთვის მხარდაჭერის შეწყვეტას დაუჭირა მხარი და მას გადადგომისკენ მოუწოდა. „სოციალ -დემოკრატიული პარტია“ რუმინეთის პარლამენტში ყველაზე დიდი პარტიაა. ამასთან, 23 აპრილს „სოციალ-დემოკრატიული პარტიის“ შვიდმა მინისტრმა თანამდებობა დატოვა.

შუამდგომლობის ინიციატორი პარტიები ბოლოჟანის მთავრობას „ეკონომიკის განადგურებაში, მოსახლეობის გაღარიბებასა და სახელმწიფო აქტივების გაყიდვაში, ასევე, მაღალი ინფლაციის გამოწვევაში ადანაშაულებდნენ“.

რუმინეთის პარლამენტის მიერ ახალი მთავრობის დამტკიცებამდე ილიე ბოლოჟანი შეზღუდული უფლებამოსილებით პრემიერ-მინისტრის მოვალეობის შესრულებას გააგრძელებს.