გერმანიას რეალური დენაციფიკაცია არ გაუვლია, - ამის შესახებ რუსეთის უშიშროების საბჭოს თავმჯდომარის მოადგილის, დიმიტრი მედვედევის სტატიაშია ნათქვამი.

დიმიტრი მედვედევმა სტატია გამოაქვეყნა, სათაურით - „გერმანიის ახალი მილიტარიზაცია: სულის აღზევება თუ თავზეხელაღებული რევანშიზმი?“.

მედვედევი აცხადებს, რომ რუსეთსა და გერმანიას შორის ომის შემთხვევაში „გერმანიის სამრეწველო ინდუსტრია სრულად განადგურდება და ევროპული ცივილიზაციის არსებობაც კითხვის ნიშნის ქვეშ დადგება“.

„რუსეთის საგარეო დაზვერვის სამსახურის საარქივო მასალებში, მათ შორის 1952 წლის ანგარიშში დასავლეთ გერმანიის პოლიტიკური მდგომარეობის შესახებ, აღნიშნულია, რომ მისი დენაციფიკაციის ნაცვლად, დასავლეთი „ნაცისტ ომის დამნაშავეებს“ ამართლებს. მთელი ეს პროცესი, რომელიც დიდი ზეიმით მიმდინარეობდა, ცნობილი პროფაშისტური ორგანიზაციების ლიკვიდაციისა და საზოგადოებრივი სივრცეების გაწმენდის გარდა, სრულ ფარსად იქცა“, - წერს მედვედევი.

მედვედევი აღნიშნავს, რომ „გერმანიის მილიტარიზაციის გათვალისწინებით, რუსეთმა 1941 წლის გამეორება არ უნდა დაუშვას“.

„ჩვენი ქვეყნისთვის ყველაზე მნიშვნელოვანია, რომ 1941 წლის ტრაგედია არ დავუშვათ. უნდა გავაცნობიეროთ, რომ ისეთი პლაცდარმების ქსელი, როგორსაც დღეს ვაკვირდებით, გერმანელებმა 1941 წლის 22 ივნისის წინაც მოამზადეს“, - აღნიშნავს მედვედევი.