პარიზის სასამართლომ სასჯელის პირობების შემსუბუქების შესახებ ნიკოლა სარკოზის მოთხოვნა დააკმაყოფილა, - ინფორმაციას გამოცემა Le Monde ავრცელებს.

სასამართლოს გადაწყვეტილებით, საფრანგეთის ყოფილი პრეზიდენტი, ნიკოლა სარკოზი 2012 წლის საარჩევნო კამპანიის უკანონო დაფინანსებისთვის ექვსთვიან სასჯელს ელექტრონული სამაჯურით არ მოიხდის.

გამოცემის წყაროების ცნობით, სასამართლოს მიერ გადაწყვეტილების მიღებისას მნიშვნელოვანი როლი სარკოზის ასაკმა იქონია.

საქმე 2012 წლის საარჩევნო კამპანიის ხარჯებს ეხება. კერძოდ, საფრანგეთის უზენაესმა სასამართლომ გასულ წელს ძალაში დატოვა ექვსთვიანი სასჯელი, ე.წ. „ბიგმალიონის“ საქმეზე, რომელმაც დაადგინა, რომ სარკოზიმ კომპანია „ბიგმალიონთან“ ერთად საარჩევნო კამპანიის დროს ხარჯები დამალა.

ცნობისთვის, გასულ წელს ნიკოლა სარკოზიმ ციხეში 20 დღე გაატარა, 2007 წლის საპრეზიდენტო კამპანიის დროს, ლიბიის ყოფილი ლიდერის, მუამარ კადაფის რეჟიმისგან დაფინანსების მიღების საქმეზე. აღნიშნულ საქმეზე მისი სააპელაციო სასამართლო პროცესი კვლავ გრძელდება.