ხელვაჩაურის მუნიციპალიტეტის მერიის მიმდებარე ტერიტორიაზე ხმაური იყო. ადგილზე მყოფი პირები აქციების დროს დაკავებული მოქალაქეების მშობლებს და ადგილობრივი მედიის წარმომადგენლებს სიტყვიერად დაუპირისპირდნენ.

არსებული ინფორმაციით, დაპირისპირებაში მონაწილე პირები, რომლებიც მედიის წარმომადგენლებსა და პატიმრების მშობლებს მერიასთან არსებულ სკვერში დაუპირისპირდნენ, ხელვაჩაურის მუნიციპალიტეტის მერიის თანამშრომლები არიან.

პატიმრების მშობლები აცხადებენ, რომ არ გაჩერდებიან და რეგიონებში შეხვედრებს გააგრძელებენ.

„მოძრაობის მიზანია, სინდისის პატიმრების ხმა მივაწვდინოთ ხალხს. 35-ე რეგიონში მივდივართ ახლა. არც გავჩერებულვართ წელიწად-ნახევარია და ვერც გავჩერდებით“, - განაცხადა გიორგი მინდაძის დედამ, ნანი წულაიამ.