საპატრიარქოს საზოგადოებასთან ურთიერთობის სამსახურის ხელმძღვანელის, დეკანოზი ანდრია ჯაღმაიძის თქმით, საქართველოს მართლმადიდებელი ეკლესიის გაფართოებული კრება, სადაც ახალ პატრიარქს აირჩევენ, პირდაპირ ეთერში არ გადაიცემა - მოგვიანებით საზოგადოებისთვის ჩანაწერი გავრცელდება.

რაც შეეხება ინტრონიზაციის თარიღს, ჯაღმაიძის თქმით, მისი განსაზღვრა უკვე არჩეულ პატრიარქს დაევალება.

საქართველოს მართლმადიდებელი ეკლესიის გაფართოებული კრების დეტალებზე საუბრისას ჯაღმაიძემ თქვა, რომ კრებაზე სიტყვით გამოსვლის შესაძლებლობა ექნებათ სამი საპატრიარქო კანდიდატის ეპარქიების წარმომადგენლებს, ასევე თითოეული ეპარქიის დელეგატებს.

„იმსჯელეს დელეგატებზე და შეთანხმდნენ, რომ სამი საპატრიარქო კანდიდატის ეპარქიის წარმომადგენლები და თითოეული ეპარქიის წარმომადგენელს ექნება საშუალება სიტყვით გამოვიდეს. მათი უფლება არ იზღუდება, მაგრამ მღვდელმთავრები თანხმდებიან, რომ ასე სჯობს, რადგან ძალიან ბევრი წარმომადგენელია და თავისუფალი არჩევის შემთხვევაში შეიძლება გაგრძელდეს სხდომა.

კენჭისყრა სამ კანდიდატს შორის ხდება. თუ რომელიმე კანდიდატი 50%-ზე მეტს დააგროვებს, ამ შემთხვევაში 20 ხმას მიიღებს, მეორე ტური არ გაიმართება. თუ ვერცერთი კანდიდატი ვერ მიიღებს 20 ხმას, მაშინ უპირატესი რჩება და მათ შორის იქნება კენჭისყრა და 39 ეპისკოპოსი ამ ორს შორის ამოირჩევს.

პირდაპირ ეთერში არ იქნება, ჩანაწერი იქნება, რომელიც მოგვიანებით გავრცელდება. ინტრონიზაციის თარიღი უნდა განისაზღვროს უკვე არჩევნების შემდეგ, რადგან ეს უნდა განსაზღვროს უკვე არჩეულმა პატრიარქმა“, - აცხადებს ჯაღმაიძე.