რუსეთში სომხეთის ელჩი გურგენ არსენიანი, უკრაინის პრეზიდენტ ვოლოდიმირ ზელენსკის მიერ სომხეთში გაკეთებული განცხადების გამო, რუსეთის საგარეო საქმეთა სამინისტროში დაიბარეს. ინფორმაციას რუსული მედია ავრცელებს.

„დიპლომატიური მისიის ხელმძღვანელს აცნობეს, რომ კატეგორიულად მიუღებელია, რომ კიევის ნაცისტური რეჟიმის ლიდერს, ვოლოდიმირ ზელენსკის, სომხეთში, ევროკავშირის ეგიდით ჩატარებული ღონისძიების დროს, რუსეთის წინააღმდეგ ტერორისტული მუქარის გამოსათქმელად ტრიბუნა დაეთმო“, - ნათქვამია საგარეო საქმეთა სამინისტროს განცხადებში.

უწყების მტკიცებით, მოსკოვი აღშფოთებულია და მიიჩნევს, რომ ერევანმა ზელენსკის სიტყვები ნეგატიურად არ შეაფასა, რაც ურთიერთობის პარტნიორულ ხასიათს არ შეესაბამება.

დიპლომატიური წყაროს ცნობით, საუბარი უკიდურესად მკაცრი იყო. არსენიანმა პირობა დადო, რომ შეტყობინებას, რაც მას რუსეთის საგარეო უწყებაში გადასცეს, თავის ხელმძღვანელობას გადასცემდა.

ცნობისთვის, ორშაბათს ერევანში, ევროპის პოლიტიკური გაერთიანების სამიტის გახსნაზე, ვოლოდიმირ ზელენსკიმ განაცხადა, რომ 9 მაისის აღლუმის დროს მოსკოვის თავზე, შესაძლოა, უკრაინულმა დრონებმა გადაიფრინოს.