ესტონეთი ევროკავშირის წევრია და რა უნდა ვთქვათ? ისინი არიან არისტოკრატები, ჩვენ გლეხი ხალხი ვართ და არ გვაქვს უფლება, გვქონდეს ის კანონები, რაც გვაქვს. სინამდვილეში, ეს ხუმრობა სწორედ იმის მაჩვენებელია, რეალურად, როგორ საერთაშორისო პოლიტიკასთან გვაქვს საქმე ევროკავშირის შიგნით, - ასე შეაფასა პარლამენტის თავმჯდომარე, შალვა პაპუაშვილმა ესტონეთში მიღებული გადაწყვეტილება, რომლის თანახმად, მესამე ქვეყნების მოქალაქეებს პოლიტიკური პარტიებისთვის შემოწირულებების გაღება აეკრძალათ.

როგორც პაპუაშვილმა ჟურნალისტებს განუცხადა, „ბალტიისპირეთის ქვეყნების პოლიტიკაში საქართველოსთან დაკავშირებით ნურც სამართლიანობას, ნურც ევროპულობას ნუ ეძებთ“.

„ასეთი ცინიზმი, ასეთი აროგანტულობაა, როდესაც თბილისისხელა ესტონეთი საქართველოს შენიშვნებს აძლევს და კარნახობს, რა უნდა მიიღოს და რა არა… მათთვის ყველაფერი ხსნილია, რაც უნდათ, ის უნდა აკეთონ. ეს არ არის ერთადერთი საკითხი. შეგახსენებთ, რომ ბევრი ასეთი რამ აქვთ მიღებული. ტალინის მოსახლეობას, არჩევნებამდე ცოტა ხნით ადრე საარჩევნო უფლება ჩამოართვეს ადგილობრივ არჩევნებზე და კაციშვილს ხმა არ ამოუღია ამაზე, აბა, ჩვენ გაგვეკეთებინა ასეთი რამ, როგორი რეაქცია იქნებოდა მათი მხრიდან. თუმცა, ნუ ეძებთ ბალტიისპირეთის ქვეყნების პოლიტიკაში საქართველოსთან დაკავშირებით ნურც სამართლიანობას, ნურც ევროპულობას“, - განაცხადა პაპუაშვილმა.

ამასთან, მან „საერთაშორისო გამჭვირვალობა-საქართველოს“ განცხადება შეაფასა, რომლის თანახმად, „ქართული ოცნების“ მიერ მიღებული საკანონმდებლო ცვლილებები, რომლითაც სამართალდამცავი ორგანოების კოორდინაციის საკითხებში სახელმწიფო მინისტრის თანამდებობა შეიქმნა, კანონიერების პრინციპთან შეუსაბამოა და ხელისუფლების დანაწილების კონსტიტუციურ პრინციპს არსებითად ეწინააღმდეგება.

„საერთაშორისო გამჭვირვალობამ“ და ეკა გიგაურმა წერონ ესტონეთის მთავრობაზე და მიღებულ კანონებზე. ის არის ესტონეთში რეგისტრირებული და დიდი ალბათობით, ესტონეთისგან დაფინანსებული ადამიანი, რომელიც უცხოეთიდან თანხას იღებს იმისთვის, რომ საქართველო დააზიანოს.ასე, რომ წეროს ესტონეთზე. საქართველოსთან დაკავშირებით მისი აზრები უინტერესოა, ვინაიდან პირდაპირ ცნობილია, რომ ეს არის უცხოური დაკვეთა ქვეყნის დასაზიანებლად. სინამდვილეში,ეს ჩვენ ბევრ რამეში გვიადვილებს საქმეს. რამდენჯერაც ვნახავთ ეკა გიგაურის მოსაზრებებს, იმდენჯერ უნდა მივხვდეთ ახლა მავნებლობა აქვს ჩაფიქრებული, რომელიღაც უცხოელს, ვინაიდან სწორედ მათი გამჟღავნებული რუპორები არიან საქართველოში“, - განაცხადა პაპუაშვილმა.